Qaradeniz Production studiyasınıñ My Homeland, Oh My Crimea adlı video işi Londonda «Açıq Avrasiya» halqara yarışta birinci yer aldı.
Bu sene yarışqa 43 devletten aman-aman 1,5 biñ ariza yollanıldı. My Homeland, Oh My Crimea işi «Videofilm» namzetliginde ğalebe qazandı. Ğalipni jüri ve internet qullanıcıları belgiledi. Videonıñ rejissöri – Dlâver Dvaciyev. Videonı çıqarmaq içün işke operator Nazim Bilâlov ve aeroçıqaruv ustazı Muhammed Seydametov celp etildi.
Videoda Qırımnıñ güzel tabiatı kösterile ve şaire Lenifer Mambetovanıñ şiirleri oqula. Yarış qaidelerine köre, videolar eki tilde – rus ve ingliz tillerinde yapılmalı. Amma Qaradeniz Production studiyası videoğa qırımtatar tilinde de satırlarnı qoştı.
