İ. Gasprinskiy adına Cumhuriyet qırımtatar kitaphanesinde belli şair, yazıcı, dramaturg, terciman ve mühbir Nuzet Umerovnıñ 85 yıllığı qayd etildi.
Doğğan kününi noyabr ayında qayd etken Nuzet efendini hayırlamaq içün bu yerde belli artistler, şair ve yazıcılar, mühbirler ve cemaat erbapları toplaştı.
Yazıcı, tahminen yetmiş yıl devamında edebiyatnen oğraşa, onıñ eserleriniñ çoqusı balalarğa bağışlanğan.
Yazıcı şiirlerni ta mektepte oquğanda yazıp başladı. Bundan soñ o, Moskvadaki M. Gorkiy adına Edebiyat institutına kirdi.
Nuzet Umerov yıllar devamında mühbircilikte çalıştı. 20 yıldan ziyade «Lenin bayrağı» gazetasınıñ (1991 senesinden başlap «Yañı dünya» adınen neşir etile) baş muarriri edi, dep bildirile İ. Gasprinskiy adına kitaphaneniñ saytında.
Yazıcını hayırlamağa kelgen «Qırım» ansambliniñ solistleri Dilâver Osmanov, Yunus Kakura ve olarnıñ reberi Server Kakura Nuzet Umerovnıñ sözlerinen yırlarnı, bunen beraber folklor eserlerini icra ettiler.
Foto: İ. Gasprinskiy adına Cumhuriyet qırımtatar kitaphanesi
