Reşat Ametovğa, elâk olğanından soñ, Ukraina qaramanı unvanı alâ daa berilmedi

09.12.201612:00

Qırımtatar faali Reşat Ametovğa Ukraina qaramanı unvanı alâ daa berilmedi.

Bu aqta Qırımtatar Qurultayı Teftiş komissiyasınıñ reisi Ali Özenbaş «ХХI asırda Ukraina: tendentsiyalar ve inkişaf kelecegi» konferentsiyasında ayttı, dep bildire «Qırım.Aqiqat».

«Bizim böyle vatandaşımız bar edi – Reşat Ametov. O, mitinglerde sözde bulunmağan, Milliy Meclisiniñ faaliyetinde iştirak etmegen edi. O… imkânına köre, cemaat toplaşqan yerlerde narazılıq levhalarınen buluna edi. İşte, onıñ ölgeninden soñ olsa da, unvanğa namzet olaraq taqdim etilgenine baqmadan, prezident (Ukraina prezidenti, – Avdet) öyle de oña Ukraina qaramanı unvanını bermedi», – dep ayttı Özenbaş.

Belli olğanına köre, Reşat Ametov 2014 senesi mart 3-te Qırım Nazirler Şurası binası yanında bir kişilik sessiz piketke çıqtı. Aynı bu kün onı qaçırdılar, mart 15-te ise Ametovnıñ cesedi, üstünde zorbalıq izleri olıp, Qarasuvbazar rayonındaki ormanda tapıldı. Reşat Ametovnıñ apayı ve üç kiçik balası qaldı. Qırım ükümeti, qırımtatar faali öldürilmesiniñ açıqlanması içün mukâfat berecek, dep söz berdi. Amma cinayetçiler alâ daa tapılmadı.

Фото аватара

Автор: Редакция Avdet

Редакция AVDET