Qırımdan çıqarılmasına qarşı narazılıq bildirip açlıq ilân etken Nedim Halilov Rusiye prezidenti Vladimir Putinge mektüp ile muracaat etti.
O, mektüpte öz ikâyeni tafsilâtlıca añlattı ve onıñ birinci niyeti, oña milleti «qırımtatar» olğanı qayd etilgen vatandaşlıqsız şahısnıñ şeadetnamesi berilmesini talap etmek olğanını ayttı. Lâkin, onıñ şahsiyetini tasdıqlağan vesiqalar – müddeti bitken Özbekistan vatandaşı pasportı ve SSCB pasportı – Aqmescitteki Demiryol (Jeleznodorojniy) rayonınıñ pasport masasına, oña vatandaşlıqsız şahısnıñ şeadetnamesini bermek ricasınen, 2013 senesi iyün ayında teslim etildi. Amma vesiqalar coyuldı, çeşit müessiselerge, bu cümleden, prokuraturağa bütün muracaatlar neticesiz qaldı.
«Men üç balalı qorantamı coydım. İşhaneden marum qalmaq, evden marum qalmaq, qorantanı coymaq, Vatannı coymaq kibi qanunsızlıqqa qarşı men narazılıq bildirme aqqımnı qullandım, men başqa adamlarnıñ menfaatlarını ve ömürlerini tiymeyim, olarğa maneviy, maddiy zarar ketirmeyim. Men açlıq ilân ettim», – dep ilân etti o.
«Ürmetli Rusiye Federatsiyasınıñ Prezidenti, işbu muracaatta qayd etilgen vaziyet boyunca tedqitat belgilemege ve menim adımı adalet içün aqlamağa rica etem, – ölümimden evelmi, ölümimden soñmı, farq etmez», – dep yazdı mektüp müellifi.
Avdetniñ evel bildirgenine köre, Nedim Halilov Qırımdan mahkeme qararına binaen çıqarıldı. Sürgün sebebi, Sovet Birligi pasportı oldı. Başqa vesiqalarnı o red etti. O, bir qaç ay devamında Krasnodar ülkesi, Lazarev rayonı, Vardan köyündeki filtratsiya noqtasında bulunacaq, bundan soñ, Özbekistanğa sürgün etilecek.
Soñra Nedim Halilov açlıqnı ilân etti. O, onı yarımadağa qaytarmasını, bunen beraber, oña milleti «qırımtatar» olğanı qayd etilgen vatandaşlıqsız şahıs statusı berilmesini talap ete.
Bundan soñ o, onı psihiatrik hastahanege keçirmege istegenleri aqqında bildirdi.
