Suvuq Sala dağ boğazında 30 yük maşnası toqtap qaldı

13.12.201613:00

Tahminen 30 yük maşnası yaramary ava sebebinden Keriç-Aqmescit yolunda Suvuq Sala (Gruşevskiy) dağ boğazından keçip olamay, bir danesi yana çevirildi.

Bu aqta tıqanıqlıqta bulunğan aydavcılardan biri bildirdi.

«Körgenim qadar 30 fura tura, bu sayığa daa körmegenim yerde turğan naqliye kirmey. Yol pek tayğalaq, ve yol hızmetleri oña qum sepkenine baqmadan, kimse aydamağa tırışmay», – dep añlattı aydavcı.

Onıñ sözlerine köre, Eski Qırım ve Qarasuvbazarğa yaqınca bulunğan yük maşnalarınıñ aydavcıları zenaatdaşlarına ratsiya vastasınen haber ete ki, olar turğan yerde yol «cam kibi».

«Tahminen bir daqqa evel haber ettiler ki, aydamağa tırışqan bir fura endi yana çevirildi. Biz yerde turmağa devam etemiz», – dep bildirdi aydavcı.

Tıqanıqlıq rayonlarında qızdıruv noqtaları barmı sualine aydavcı ayttı ki, aydavcılar eñ yaqın qavehanede qızına. Suvuq Sala dağ boğazı, yaramay ava sebebinden dekabr ayından martqa qadar areket sıñırlanması kirsetile bilgen avtomobil yollarınıñ qısımları cedveline kire, dep bildire «Krıminform».