Amsterdam mahkemesi skit altınını Ukrainağa teslim etmek qararını aldı

14.12.201616:15

Bugün Amsterdam okrug mahkemesi, Qırım müzeylerinden alıp ketirilgen skit altını taqımı Ukrainağa qaytarılmaq kerek olğanı aqqında qarar aldı.

Bunen beraber, mahkeme, eksponatlar qaysı tarafqa ait olğanı aqqında mesele boyunca qararnı almağa red etti.

«Eki taraf artefaktlarğa öz qanuniy aqlarını bildirdi. Amma qanun boyunca, bu mesele, taqım Ukrainağa qaytarılğan soñ, ukrain mahkmesi tarafından baqılmaq kerek», – dep bildire TASS qararnıñ metinini.

Mahkemede qayd ettiler ki, taqım, şikâyet arizası berirlmesi içün ayırılğan üç aylıq müddet yekünlenecegine qadar Felemenkte qala bile.

Bunen beraber, Ukrainanı skit altınınıñ saqlanuvı ve taşınması içün tölemege mecbur ettiler.

Qırım müzeyleri Amsterdam mahkemesiniñ qararına şikâyet etmege niyetlene.

Rusiye Medeniyet nazirligi işbu qararnı tenqit etti.

«Yazıq ki, işbu qarar, medeniyet müessiseleri aqlarınıñ ve müzey taqımlarınıñ bozuluvı misalidir», – dep qayd ettiler müessisede.

Medeniyet nazirliginde aytalar ki, «müzey eşyaları, tapılğan ve yıllar devamında saqlanıp qalğan yerge, Qırımğa qaytarılmaq kerek».

Ukraina Tışqı işler nazirliginde Amsterdam mahkemesi qararınıñ ğalebe olğanını aytalar.

«Ukrainanıñ müim bir ğalebesi. Qanun bizim tarafımızda. Crimea is Ukraine», — dep yazdı Ukraina Tışqı işler nazirliginiñ spikeri Maryana Betsa Twitterdeki mikroblogında.

Ukraina prezidenti Petro Poroşenko ise, ilân etti ki, skit altınınıñ Kiyevge teslim etmek Amsterdam mahkemesiniñ qararı, Qırımnıñ Ukraina territoriyası olğanını tanımasıdır.

Ukraina ükümeti 2014 senesiniñ başında, Qırım Rusiyege qoşulmazdan evel, «Qırım: Qara deñiz altını ve sırları» sergisini Amsterdamğa, Allard Pirson müzeyine ketirdi. Sergi eksponatları skit altından ibarettir.

Dört Qırım müzeyi Amsterdam mahkemesinde dava açıp, skit altınını Felemenkten Qırımğa qaytarmağa talap etti.

Author: Редакция Avdet

Avdet gazetası