Aqmescit civarındaki eki köyniñ tarihiy adlarını qaytaracaq olalar

14.12.20168:29

Aqmescit rayonındaki Aqtaçı Qıyat (Beloglinka) ve Saraylı Qıyat (Mirnoye) köylerinde yaşağan qırımtatarlarnıñ gruppası köylerge kirişlerde tarihiy adları – Ataş Qıyat ve Saraylı Qıyat – yazılğan levhaçıqlarnı qoymaq ricasınen köy şurasına muracaat etti.

Sakinler muracaatnı Saraylı Qıyat köy şurasına berdi, işbu köyler bu şurağa kire.

Köy şurası bu muracaatnı qanaatlendirmek qararını aldı.

İşbu qarar ta oktâbr 17-de qabul etildi, amma halqqa tek bu künleri bildirildi.

Amma cemaatçılarnıñ bazıları ve «Yedinaya Rossiya» firqasınıñ azaları bu qararğa qarşı çıqtı.

Böyleliknen, özüni «Yedinaya Rossiya» firqasınıñ azası dep tanıtqan cemaatçı Natalya Krıjko Facebook içtimaiy ağında diger cemaatçını, «Tavriya birligi» cemaat teşkilâtı reisiniñ sabıq muavini Liliya Didenkonı «büyük hata» yapılmasına yol bermemege çağırdı.

«Öyle malümat bar ki, Saraylı Qıyat köy şurası deputatı Halilov S.N. Mirnoye köyüne türk adını bermek içün imza cıya. Köy deputatları yaqın vaqıtta qapalı sessiyada bu qararnı qabul etecek ola. Eger bu aqiqat ise, keliñiz, beraber hata yapılmasına yol bermeyik!» – dep yazdı Krıjko.

kryzhko1

Didenko ise, köy şurasınıñ tünevinki sessiyası nasıl keçkenini añlattı. O yerde deputat Yekaterina Avdeyçik köyniñ tarihiy adı ile işaretniñ qoyulması aqqında qararnıñ muzakere etilmesi meselesini meydanğa çıqardı.

Onıñ sözlerine köre, oktâbr ayında bu qararğa qol tutqan deputatlar, bu cümleden «Yedinaya Rossiya» firqasınıñ azaları, bu sefer özüni aqlamağa tırışqan.

«Deyler ki, olar yol işaretleri qoyulması «imkânı» aqqında qarar aldı – bu tek imkân ve başqa bir şey degil, belki, isterler, belki de, yoq… bizim mında işimiz yoq!)… Bu sözlerden soñ bu «Yedinaya Rossiya» masqaralı azalarından nege bu «imkânğa» yol berdiler??? Evel bu imkân yoq edi, ve kimde nervalanmağan! Köylerde ayat raat keçe edi!!! …nege böyle insanlar Prezidentimizniñ partiyasında otura??? Nege bu provokatorlar vazifelerinde buluna??? Sessiya neticesinde mesele kün mevzusına kirsetilmedi, rey berüvge qoyulmadı…» – dep ayttı Didenko.

Фото аватара

Автор: Редакция Avdet

Редакция AVDET