Qırımtatarlar, «Sudaqlı dört kişiniñ» cezalarını töledi

15.12.201617:25

Qırımtatar iş adamları ve Sudaq sakinleri «Sudaqlı dört kişiniñ» cezalarını tölemek içün para cıymağa yardım etti.

Bu aqta qırımtatar faali Lenora Dülber Facebook saifesinde bildirdi.

«Balalarnıñ cezalarını tölemek içün para cıymağa yardım etken qırımtatar iş adamlarına, bunen beraber, Sudaq sakinlerine ayrı teşekkürler bildiremiz. Bütün para cıyıldı, yigitler problemanen yüz yüzge qaldı», – dep yazdı o.

Bugün Qırım Yuqarı mahkemesinde Enver Çavuş ve Seytmemet Seytumerovnıñ apellâtsiya şikâyeti baqılması boyunca toplaşuv keçirildi.

Adliyeci Aleksandr Popkov, Lenora Dülberniñ sözlerine binaen, yigitler qanunnı bozmağanını, hususan, avtomobilde bayraqnen areket etüv, miting olmağanını ayttı. Lâkin, mahkemeci qarar aldı ki, bu qararğa binaen, Sudaqnıñ dört sakini cemaat merasimini keçirgen, ve mahkeme olarnıñ areketlerinde piket alâmetlerini kördi. Amma mahkemeci Timoşenko Sudaq mahkemesinen qanun bozulması tasnifi (klassifikatsiyası) boyunca razı olmadı. Böyleliknen, Çavuşnı ve Seytumerovnı merasimni teşkil etkenlerinde degil de, merasimde iştirak etkenlerinde qabaatladılar, bu ise cöremeni deñiştire – 20-den 10 biñ rublege qadar.

Bu iş boyunca qabaatlanğan daa eki kişi, Alim Muslâdinov v Ablâkim Ablâkimovnıñ şikâyet arizaları dekabr 22-de saat 15:30-da ve 15:45-te baqılacaq.

Hatırlatamız, mayıs 18-de Sudaq şeerinde qırımtatar bayraqlarınen öz yengil maşnalarınen yürgen dört qırımtatar gençi yaqalandı. Amma mahkeme cinaiy işni qapatmaq qararını aldı.

Avgust 29-da Qırım Yuqarı mahkemesi, Rusiye İçki işler nazirliginiñ Sudaq bölügi yolbaşçısınıñ vazifesini eda etken Dmitriy Krekovnıñ mayıs 18-de milliy bayraqlarnen şeerde yürip keçken dört qırımtatar gençine nisbeten davanıñ qapatılması aqqında Sudaq şeer mahkemesiniñ qararına qarşı şikâyetini baqtı.