Aqmescitte qırımtatar antikafesi açılacaq

16.12.201617:12

Yarın, dekabrniñ 17-de, Aqmescitte “Yurt” qırımtatar antikafesiniñ açıluvı közde tutula.

Teşebbüsçilerniñ bildirgenine köre, bu kibi kafede em dostlarnen qonuşmaq, em ders baqmaq, em çalışmaq, em yañı adamlarnen tanış olmaq imkânı olacaq.

“Bu yerde em toplaşuv, em ufaq kontsert programmasını , em bir de bir oyunlarnı teşkil etmek, doğğan künni qayd etmek, şahsiy kinoseans keçirmek imkânı”, – ikâye ete teşkilâtçılar.

“Yurt” antiqavehanesinde em çay, em qave, em pahlava, çeşit tatlılıqlar; WI-FI; şahsiy kitaphane; proyektor; printer, kseroks, skaner; çoqtan-çoq masa oyunları; çeşit mevzuda tedbirler ve icadiy körüşüvler; meraqlı treningler, seminar ve master-klass keçirmek imkânı yaratıldı.

Açıluv merasimi Aqmescitte Karl Marks soqağı, 14 (“Hazine” tükânınıñ azbarında) saba saat 11-de ötkerilecek.

Yarın saat 16-da “Hip-Hop QIRIM” gruppasınen icadiy körüşüv, aqşam saat 18-de ise “Mafiya” oyunınıñ keçirilmesi közde tutula.