Rusiye Federatsiyasınıñ Devlet Şurası yerli ve regional akimiyet vekillerine şeerlerniñ bazı qısımlarına kirmek içün para tölemek kerek olacağı aqqında qanun leyhasını birinci oquvda qabul etti.
Bu aqta parlamentniñ aşağı palatasınıñ saytında haber etile.
Qanun leyhası boyunca, «para alıp, yol areketini semereleştirmek» niyetinen, yerli akimiyetke bazı qısımlarda arabalarnıñ areketini sıñırlaştırmaq aqqı berilecek.
Bundan da ğayrı, vesiqa boyunca, şeer memuriyeti azbarlardaki araba turaqları içün da para ala bilecek. Añlatıcı tezkerede, qabul olunacaq qanun vastasınen yol areketiniñ havfsızlığını yükseltmek, iqtisadiy masraflarnı azlaştırmaq ve memlekette yol areketine nisbeten bir añlaşma qabul etmek imkânı peyda olacağı qayd etile.
Vesiqada, «şeerniñ bir de bir qısmına şahsiy arabalarda kiriş para vastasınen olğan taqdirde, marşrutka ya da diger bir vastalar közde tutulması şart» denile.
«Rusiye Federatsiyasında yol areketini teşkil etüv ve bazı bir qanunlarğa deñişmeler kirsetüv aqqında» (№ 1047264-6) qanun leyhasınıñ metininen RF Devlet Dumasınıñ saytında tanış olmaq mümkün.
