Dekabr 18-de, bazar künü Sankt-Peterburg şeerinde qırımtatarlarğa destek olaraq «Strategiya-18» bir kişilik piketleri ananeviy aktsiyası keçirilgen edi, neticede belli olmağan şahıslar miting keçirgenlerniñ bazılarına ücüm etti.
Aktsiya iştirakçilerinden biri olğan Dinar İdrisovnıñ bildirgenine köre, bir insan yaralandı.
«Piterde urmaq. Qırımda repressiyalarğa qarşı bir kişilik narazılıq bildirgen adamğa ücüm Peterburg şeerinde etildi. Bir kişi yaralandı. Politsiya iç areket etmedi», – dep yazdı faal.
Cemaat faali Yana Turovanıñ Facebook saifesinde yazğanına köre, narazılıq bildirgen adamlarğa ücüm, aktsiyanıñ soñuna qadar 15 daqqa qalğanda etildi. Belli olmağanlar 4 plakatnı yırttı.
«Mihail Gerasimovnıñ betine urdılar, dudağı yırtıldı. Bundan soñ Mihail bir qaç vaqıtqa esini coydı», – dep yazdı o.
Qırımtatarlarğa destek olaraq «Strategiya-18» aktsiyası müddetsiz olaraq planlaştırılğan, aktsiya er aynıñ 18-inde keçirile.
Avdetniñ bildirgenine köre, qırımtatarlarğa destek olaraq «Strategiya-18» bir kişilik piketleri noyabr 18-de Sankt-Peterburg şeerinde keçirildi. Aktsiya teşebbüsçileri, çeşit demokratik firqalar ve areketlerden vatandaş faaleriniñ gruppası oldı.
