«Hizb ut-Tahrir» işi boyunca yaqalanğan kişi azaplar aqqında bildirdi

22.12.201610:40
узаир абдуллаев

«Hizb ut-Tahrir» işi boyunca yaqalanğanlardan biri olğan Uzair Abdullayev Qırım Yuqarı mahkemesinde, apishanede bulunma müddetiniñ devam ettirilmesi aqqında şikâyet baqılğan vaqıtta, azaplar aqqında ilân etti.

«Uzair taqiqat faaliyeti alıp barılğan şartlarınen bağlı malümat bildire. Olarnı, bir yerden başqa yerge ketirgen vaqıtta, avtomobilniñ tabanında bağlanğan ellerinen tutalar ve uralar. (…) Uzair ayta ki, qursaqqa ve ayaqlarğa urğan ediler», − dep yazdı faal Osman Arifm Facebook saifesinde.

Mahkeme, öz nevbetinde, Abdullayevniñ aytqanlarına diqqat etmedi ve şikâyetni qanaatlendirmeyip qaldırdı. Adliyeci Emil Kurbedinov böyle munasebet ile «mahküm etilgenlerniñ aqlarını körmemezlikke uruv ve halqara konventsiyalarnıñ bozuluvı aqqında» ilân etti.

Bundan da ğayrı, mahkeme bugün Teymur Abdullayevniñ apiste bulunma müddetiniñ devam ettirilmesi aqqında qararnı deñiştirmeyip qaldırdı.

Hatırlatamız ki, oktâbr 12-de Qırımda 5 qırımtatarnıñ evinde tintüvler keçirildi, bundan soñ olar, Rusiyede yasaqlanğan «Hizb ut-Tahrir» teşkilâtınen bağlı olğanında qabaatlanıp, yaqalandı.