Moskvada İosif Stalinniñ torunı Yevgeniy Cungaşvili vefat etti.
80 yaşındaki Cugaşvili ölüminiñ sebebi şimdilik belli degil, dep bildire «RİA Novosti».
Yevgeniy Cungaşvili 1936 senesi Stalinniñ büyük oğlu Yakovnıñ qorantasında doğdı. O, Kalinino suvorov oquv yurtuna kirip, arbiy kişi karyerasını başladı, bundan soñ oquşnı Jukovskiy adına Arbiy-ava müendis akademiyasında devam etti. Cugaşvili Sergey Korolevniñ konstruktor bürosında arbiy müendis oldı, «Baykonur» kosmodromından kâinat gemileriniñ, bu cümleden birinci kosmonavt Yuriy Gagarinniñ gemisiniñ azırlanuvı ve uçurıp yibermesinde iştirak etken edi.
Bundan soñ Cugaşvili arbiy tarih ile meraqlandı, namzet dissertatsiyasını qorçaladı ve çoq yıl devamında arbiy akademiyalarda ders berdi. 55 yaşında polkovnik Cugaşvili Silâlı quvetlerini terk etti.
O, 1991 senesinden başlap, rusiyeli ve gürci siyasette kommunist areketi faali olaraq iştirak etmege başladı. Cugaşvili, qartbabasınıñ ar-namusını qorçalap, çeşit kütleviy haber vastalarınen çoq mahkemeleşe edi. 2015 senesi «Qartbabam — Stalin. O — muqaddestir!» hatıralar kitabını yazdı, bunen beraber babası Yakov Cugaşvili aqqında filmde Stalin rolüni icra etti.
Yakov Cugaşvili, üyken leytenant-topçu, 1941 senesi esirge alındı ve 1943 senesi aprel ayında Zaksenhauzen toplama lagerinde elâk oldı.
