Qara deñiz üstünde rusiyeli askerler ile uçaq qazağa oğradı

25.12.201613:55
разбился ту-154

Soçi yalısı yanında Rusiye Federatsiyası Mudafaa nazirliginiñ Tu-154 uçağı, yükselmege yetiştirmeyip, qazağa oğradı. 92 insan elâk oldı.

Elde etilgen malümatqa binaen, uçaqta sekiz erkân azası ve 84 yolcu bar edi. Olarnıñ arasında rusiyeli arbiy adamlar, bunen beraber, Süriyede «Hmeymim» aerodromında Rusiye Ava-kâinat quvetleriniñ aviagruppasını Yañı yıl ile hayırlamaq içün ketken Aleksandrov adına ansambliniñ 68 artisti ve rusiyeli kütleviy haber vastalarınıñ doquz temsilcisi oldı.

Uçaq, dekabr 25-te Moskva saatınen saat 05:27-de, Soçiden çıqqan soñ radarlardan ğayıp oldı. O yerge uçaq Çkalovskiyden yaqarlıq almaq içün keldi. Süriyeli Latakiyağa ketken ava gemisi uçıp çıqqanından yedi daqqa keçken soñ, yalıdan tahminen beş kilometr uzaqlığında suvğa tüşti.

Elâk olğanlar arasında Aleksandrov adına yır ve oyun ansambliniñ bediiy reberi, baş arbiy dirijör Valeriy Halilov, «Spravedlivaya pomoşç» («Adaletli yardım») fondunıñ yolbaşçısı Yelizaveta Glinka (daa çoq Doktor Liza adınen belli olğan), RF Mudafaa nazirligi medeniyet idaresiniñ müdiri Anton Gubankov, Birinci kanalnıñ üç mühbiri, NTV ve «Zvezda» telekanallarınıñ çıqarıcı taqımları oldı.

разбился ту-154

tu-154