Açlıq ilân etken Nedim Halilov, onı özüni öldürmege istegen alına ketirgenleri aqqında Baş prokuraturağa bildirecek

26.12.20169:25

Qırımtatar faali Nedim Halilov, onıñ Qırımdan sürgün etilmesine qarşı narazılıq bildirip, endi 35 kün devamında açlıq tuta. O, onı özüni öldürmege istegen alına ketirgenleri içün cinaiy iş açma aqqında Baş prokuraturağa ariza berecek ola.

Bu aqta qırımtatar uquq qoruyıcısı Ayder İsmailov bildirdi.

«Nedim Halilov ile bağlandım. Bugün qırımtatar halqınıñ aqları ve serbestligi içün açlıqnıñ 34-ci künü. Vaziyet kritiktir, sesü zayıflağan ve yaramay eşitilgen, areket etmey, daima yata. Qırımtatarnıñ sağlığını baqmaq içün tibbiy hadimler yiberilmey» – dep yazdı İsmailov Facebook saifesinde.

Bunen beraber o añlattı ki, özü de bu munasebet ile Qırım Cumhuriyeti prokuraturasına ariza berdi.

Bundan da ğayrı, Nedim Halilovnı imaye etmek içün cemaatçılar petitsiya yazdı.

Muracaatta Nedim Halilovnıñ uquq qoruyıcı faaliyetiniñ esas basamaqları añlatıla. Hususan qayd etile ki, o, qanun boyunca areket etip, qırımtatar halqınıñ aqlarını qorçalağanda halqara uquqnı qullanıp, Birleşken Milletler Teşkilâtı Ayırım ve rasizm boyunca komitetke tamır qırımtatar halqına qarşı devam etken genotsid ve ayırım aqqında deliller ketirdi, işbu deliller boyunca rezolütsiya qabul etilgen. 2014 senesi mart ayına qadar Nedim Halilov oña Qırım muhtar Cumhuriyeti (Ukraina terkibinde) territoriyasında vatandaşlıqsız şahıs statusı berilmesini talap etken edi.

«2014 senesi mart ayından başlap, Qırım boyunca mecburiyetni boynuna alğan Rusiye Federatsiyası da Nedim Halilovğa qarşı aq-uquqlarnı ve serbestlikni bozğan areketler etmege devam etti. Nedim Halilov, qanun çerçivesinde areket etmege devam etip, er angi müessiselerge muracaat etip, Rusiye prezidentine qadar yetti, oña qırımtatar halqına qarşı devam etken ayırım ve aq-uquqnı yañıdan tiklemege manialar ve repressiyalarğa oğrağan halqlarnıñ aqları yañıdan tiklenilmesi boyunca tedbirler aqqında prezident emiriniñ sabotajı aqqında añlattı… Öz neticelerinde o böyle aytqan: «Menim içün tarihiy vatanım Qırımğa tabiiy aqqımnı tanımağan, bunen beraber, Esas qanun aqlarımnı, qoranta, ev, emek, ad, millet aqlarımnı tanımağan Ukraina ve Rusiye arasında printsipial bir farq yoqtır. Ukraina Anayasasında, Rusiye Federatsiyası Anayasasında kibi, menim ile devlet arasında munasebetlerni idare etken qaideler yoq, bu ise, maña aqlarımnı ve vaziyetimni körmemezlikke urğan Anayasanı imzalamamağa tabiiy aq bere», – dep aytıla petitsiyada.

Nedim Halilov, Qırım yarımadası territoriyasında 1986 senesinden başlap bulunıp, sürgünlikten avdet olunmaq aqqınıñ saibi Qırım yarımadasınıñ tamır halqı olaraq qırımtatarlarnıñ vaziyetini idare etken qaideler olmağan Anayasası olğan Ukrainanıñ vatandaşlığını almadı. Aynı sebepten Halilov rusiyeli vatandaşlıqnı da red etti.

Avdetniñ evel bildirgenine köre, Nedim Halilov Qırımdan mahkeme qararına binaen çıqarıldı. Sürgün sebebi, Sovet Birligi pasportı oldı. Başqa vesiqalarnı o red etti. O, bir qaç ay devamında Krasnodar ülkesi, Lazarev rayonı, Vardan köyündeki filtratsiya noqtasında bulunacaq, bundan soñ, Özbekistanğa sürgün etilecek.

Soñra Nedim Halilov açlıqnı ilân etti. O, onı yarımadağa qaytarmasını, bunen beraber, oña milleti «qırımtatar» olğanı qayd etilgen vatandaşlıqsız şahıs statusı berilmesini talap ete. Bundan soñ o, onı psihiatrik hastahanege keçirmege istegenleri aqqında bildirdi.

Eki afta evel Nedim Halilov Rusiye prezidenti Vladimir Putinge mektüp ile muracaat etti.

Author: Редакция Avdet

Avdet gazetası