Rusiye Federatsiyası Yuqarı mahkemesi prokurornıñ şikâyetini qanaatlendirdi ve «Hizb ut-Tahrir» bölügini teşkil etkeninen qabaatlanğan Ruslan Zeytullayevniñ işini Rostov-na-Donu şeerindeki Şimaliy-Qavqaz arbiy okrug mahkemesine yolladı.
Bu aqta adliyeci Emil Kurbedinov bildirdi.
Onıñ sözlerine köre, dava baqılması neticesinde Zeytullayevniñ cezası daa qattı olacaq. 205.5 maddesiniñ 1-ci qısmı («Terroristik teşkilâtnıñ faaliyetini teşkil etüv») 15 yılğa ya da ebediyen apiske qapatılmasını közde tuta.
Bu iş boyunca yaqalanğan diger musulmanlarnıñ, yani Nuri Primov, Rustem Vaitov ve Ferat Sayfullayevniñ cezalarını mahkeme deñiştirmedi.
Hatırlatamız ki, prokuror «Aqyarlı dört kişi» işi boyunca mahkemeniñ Ruslan Zeytullayevge nisbeten qararına şikâyet arizasını berdi. Evel o, Zeytullayevni 17 yılğa qattı nizam koloniyasına qapatmağa talap etken edi.
Avdetniñ bildirgenine köre, Rostov-na-Donu şeerindeki arbiy mahkeme «Hizb ut-Tahrir» işi boyunca yaqalanğanlar boyunca üküm çıqardı. Böyleliknen, terroristik faaliyetni teşkil etkeninen qabaatlanğan Ruslan Zeytullayev 7 yılğa apiske qapatıldı, Ferat Sayfullayev, Rustem Vaitov, Nuri Primov 5 yılğa umumiy nizam koloniyasına tüşti.
