Aqmescitteki Bor Çoqraq (Fontanı) qasabasında yerleşken «dört prezidentniñ mektebi» yarın, dekabr 29-da, qurucılıq obyekti olaraq teslim etilecek.
24 yıl devamında qurulğan mektepke 44 sanını ve belli qırımtatar qaramanı, istihbaratçı, Rusiye qaramanı Alime Abdennanova adını bermege planlaştıralar.
Müessisede 900 talebe oquycaq, bu yerde tasil qırımtatar tilinde berilecek. Mektep zemaneviy donatmalar, bu cümleden, yanğın havfsızlığı ve video nezaret sistemalarınen teminlenecek, dep bildire «RİA-Krım».
Avdetniñ evel bildirgenine köre, bu sene oktâbr ayında belli oldı ki, qırımtatar qasabasında çoq beklenilgen mektep «milliy» olmaycaq. Böyle netice sentâbr ortasında Qırım paytahtında qapalı toplaşuv keçirilgen soñ çıqarıldı, bu yerde mektep müdiri belgilendi. Aqmescit memuriyetiniñ reisi Gennadiy Baharevniñ yolbaşçılığındaki komissiya qırımtatar namzetlerinden iç birini saylamadı. Aqmescit şeeri memuriyeti tasil idaresiniñ qararınen mektep müdiri vazifesinie N.M. Bondarenko tayinlendi.
Bu haber cemaat erbaplarını ve yerli sakinlerni eyecanlandırdı. Qırımtatarlar toplu yaşağan Aqmescitteki Bor Çoqraq (Fontanı) qasabasınıñ sakinleri toplaşuv keçirdi, merasimde «dört prezidentniñ mektebi» adınen belli olğan bu yerde qurulğan mektepniñ statusı meselesi muzakere etildi. Toplaşuv neticesinde rezolütsiya qabul etildi, vesiqa boyunca, qurulğan oquv yurtunıñ statusı, Qırım müendislik ve pedagogika universiteti imayesinde qırımtatar tilinde tasil berüv ile«Mektep-litsey» oquv-terbiyelev kompleksi olaraq belgilenmesi talap etilecek. Bundan da ğayrı, qasaba sakinleri, mektep müdiri ve ocalar terkibi belgilenmesi meselesinde olarnıñ fikri de köz ogüne alınmasını talap ete.
