Kiyevde devletke hiyanetlik etken Qırım deputatları ne yerde mahküm etilecegi aqqında qarar alındı

05.01.201714:57

Kiyev Apellâtsion mahkemesi Qırım Yuqarı Şurasınıñ sabıq deputatlarına qarşı cinaiy işler ne yerde baqılacağını belgiledi.

Bu aqta Kiyev Apellâtsion mahkemesiniñ fermanında aytıla.

Anatoliy Zaiçenko, Yefim Fiks, Sergey Şuvaynikov, Edip Gafarov, Vitaliy Nahlupin, Svetlana Savçenko, Sergey Tsekov ve Grigoriy İoffege qarşı qabaatlav vesiqaları Kiyev Desnânskiy rayon mahkemesine teslim etildi.

Konstantin Baharevniñ işi Ukraina paytahtınıñ Podolsk rayon mahkemesine yollanıldı.

Remzi İlyasovnı devletke hainlik etkeninde şeklenüv (Ukraina Cinaiy kodeksiniñ 111-ci maddesi) boyunca cinaiy iş Solomenskiy mahkemesine, Vladimir Klıçnikovnıñ işi ise, Kiyevdeki Dnepr rayon mahkemesine teslim etildi.

Ukraina Cinaiy kodeksiniñ 111-ci maddesi 1-ci qısmı («Devletke hiyanetlik etüv, yani Ukraina vatandaşı tarafından Ukrainanıñ mustaqilligi, topraq bütünligi ve toqunmaması, mudafaa etmek qabiliyeti, devlet, iqtisat ya da malümat havfsızlığına zarar ketirip aselet yapılğan areket: cenk vaziyette ya da silâlı dava vaqtında duşman tarafına keçüv, casuslıq, ecnebiy devlet, ecnebiy teşkilâtqa ya da olarnıñ temsilcilerine patlatma faaliyetinde yardım kösterüv») boyunca şeklenilgen adamlarnıñ tolu cedvelini bu bağlantı vastasınen ögrenmek mümkün.

Foto: Facebook Elvina Seitbullaeva

Фото аватара

Автор: Редакция Avdet

Редакция AVDET