Türkiyeniñ Gürcistan ve Ukraina topraq bütünligi boyunca noqta-i nazarını yañıdan baqmaq niyeti yoq.
Bu aqta yanvar 9-da, bazarertesi künü Türkiye Tışqı işler nazirligi yolbaşçısı Mevlüt Çavuşoğlu Ankarada elçiler konferentsiyasında ilân etti.
Bunen beraber o qayd etti ki, Moskvanen işbirlik bunı közde tutmay, dep bildire «Eho Kavkaza» («Qavqaz akissedası»).
«Biz Ukraina ve Gürcistan topraq bütünligine qol tutamız. Biz topraqlarnıñ işğalini tanımaymız… Rusiye ile muzakereler çoq davalarnıñ çezilmesine isse qoşmağa imkân berecek», – dep ayttı Çavuşoğlu, onıñ sözlerini türkiyeli kütleviy haber vastaları bildire.
Süriye davası aqqında aytqanda, o ayttı ki, Türkiye Süriyede barışıq olmasını pek istey.
«Ankara Türkiyeniñ bütün toprağında barışıq olması içün elinden kelgenini yapa. Süriye boyunca Cenevre ceryanına qol tutamız ve aynı vaqıtta bu devletniñ şimalinde İslâm Devleti ile küreşni alıp baramız», – dep ayttı Çavuşoğlu.
O, ayttı ki, «Türkiye Süriyeniñ topraq ve siyaset bütünligine faal şekilde destek köstermege devam etecek».
