Çeçenistan prezidenti Ramzan Kadırov halq ögünde İosif Stalinni 1944 senesi çeçenlerni sürgün etkeni içün qarğadı
«Halqlar yolbaşçısı» adına öz lânet sözlerini Çeçenistan Cumhuriyeti yolbaşçısı Çeçen halqınıñ devletçiligi yañıdan tiklenüvi kününe bağışlanğan tantanalı merasimde ayttı. Merasim yanvar 10-da Groznıy şeerinde keçirildi.
«Ecdatlarımız ğayrı insaniyetli imtianlarğa rastkeldi, amma özüni sebatlı ve mert kösterdi. Sürgünlikten soñ, ana toprağında yaşamaq ve inkişaf etmek içün küç taptı. İosif Stalin çeçen ve diger halqlarnı yar ucuna ketirdi. Lânet olsun!» – dep ilân etti Kadırov.
O, öz lafını çeçen tilinde ayta edi, rus tiline tercimesini Kadırovnıñ matbuat hızmeti taqdim etti.
Çeçenistan yolbaşçısı hatırlattı ki, Stalinniñ yerine kelgen Nikita Hruşev «adaletniñ yañıdan tiklenüvine yol berdi», bunıñ içün çeçenler bugünki künge qadar oña minnetdarlar.
Kadırov ayrıca babası, Çeçenistannıñ birinci prezidenti Ahmat-Hacı Kadırovnıñ yararlıqlarını da qayd etti.
1944 senesi çeçen ve inguş halqları alman ordusınen işbirlik tutqanınen qabaatlandı ve Orta Asiyağa sürgün etildi. Bundan evel olğan Çeçen-İnguş Muhtar Sovet Sotsialistik Cumhuriyeti yoq etildi. Onıñ topraqlarınıñ bir qısmı qomşu subyektler arasında bölündi – Şimaliy Osetiya ve Dağıstan Muhtar Sovet Sotsialistik Cumhuriyetleri, Gürcistan Sovet Sotsialistik Cumhuriyeti ve Stavropol ülkesi, qalğan qısımda Groznıy vilâyeti teşkil etildi. 1957 senesi Çeçen-İnguş muhtariyeti yañıdan tiklendi.
Telegramda kanalımızğa qoşulıñız ve eñ aktual ve meraqlı malümatlardan haberdar oluñız