Qırım mektebinde balalar üşüy

17.01.201710:25

İslâm Terek (Kirovskoye) rayonındaki Caylav Saray (Zolotoye Pole) köyüniñ mektep talebeleri sınıflarda buzlap qala.

Bu aqta birinci sınıf talebesiniñ anası Tatyana Bagayeva içtimaiy ağlarda bildirdi.

Onıñ sözlerine köre, soñki üç ay devamında mektep künde tek 2-3 saat qızdırıla, ve binada ava sanitar qaidelerine köre olmaq kerek olğan 18-20 derecege qadar qızdırılmay. Mektep talebeleri yanvar 11-de tatilden oquşqa qaytqanda ise, sınıflarda ava arareti 8 derecege qadar edi.

«Sınıfımızda ava arareti +6-ğa qadar tüşken edi. Qızdırğıçlar bile yardım etmey, çünki pencerelerden pek üfüre. Balalar üşüy ve hastalana. O qadar hastalana ki, 18 adamdan oquşqa 2 bala kele. Mektebimizde soyunuv odası bile yoq, çünki qışta balalar kürk tonlar ve kurtkalarnen oturıp oquy», – dep ayttı balanıñ anası.

Açuvlanğan ana-babalar mektep müdiresi Valentina Ratuşinağa da narazılıq bildirdi. Amma o, olarğa böyle ayttı: «Balalarnı evleriñizde qızdırıñız!».

Valentina Ratuşina, RİA Novosti agentligine izaat berip, ilân etti ki, sınıflar tahminen +18 derecege qadar qızdırıla, amma sanitar qaidelerine uymaq qıyındır.

«Biz birinci künler oquymız. Tatilde qızdıruv biraz yengilce edi, çünki sistemanı tamir etken edik. 20 derece yoq, amma 18 bizde bar. Böyle vaziyet tatilden evel de edi. Qaidege uymağa tırışamız, amma çoq sıcaqnı coyamız – eski bina, eski pencereler», – dep ayta müdire.

Ratuşina qayd etti ki, mektep acele tamirge, hususan pencerelerniñ deñiştirilüvine, muhtac.

Vaziyet kütleviy haber vastalarında aydınlatılğan soñ, mektep müdirligi pencerelerni mahsus kâğıtlarnen yapıştırdı. Amma, Tatyana Bagayevanıñ qayd etkenine köre, sınıflar öyle de suvuq qalmaqta.

Qırım tasil naziri Natalya Gonçarova vaziyetni baqıp çezmege söz berdi.

«Menim içün bu işarettir. Er şeyni teşkerecem. 6-8 derece – böyle şey olmamaq kerek», – dep ayttı nazir, bildire «Krımskaya gazeta».

Author: Редакция Avdet

Avdet gazetası