Belli qırımtatar faali Ahtem Çiygoznıñ işi boyunca 2014 senesi fevral 26-da keçirilgen mitingde çıqarılğan fotoresimlerden ibaret olğan maddiy deliller zararlanğan kişilerniñ delillerini red ete.
Bu aqta yanvar 17-de Çiygoznıñ adliyecisi Nikolay Polozov video izaatında bildirdi.
«Bazı fotoresimlerde Çiygoz bar edi. O, (Qırım Muhtar Cumhuriyeti Yuqarı Şurasınıñ, – Avdet) içki azbarınıñ sağ tarafında edi – «göñülli quvetler» ve miting iştirakçileriniñ sıñırdaşlığından başqa bir yerde. Onıñ, emir bermek imkânı yoq edi. Bunen beraber, bu fotoresimlerde Çiygoznıñ ellerinen nasıldır areketler yapqanı körünmey, amma zararlanğan şaatlar aksini aytqan edi», – dep ayttı Polozov.
Adliyeciniñ malümatına binaen, taqdim etilgen fotoresimlerde körüne ki, «böyle adlandırılğan halq göñülli quvetleri azaları QMC Yuqarı Radası binasına «Russkoye Yedinstvo» firqasınıñ mitingi başlanacaq vaqtından bayağı ertece keldi. Olar, içki azbarnıñ büyük qısmını qaplap aldı, böyleliknen, Qırımtatar Milliy Meclisi mitinginiñ iştirakçilerine toplaşuvlar keçirmek aqqını sıñırladı».
Polozovnıñ haber etkenine köre, nevbetteki mahkeme toplaşuvı yanvar 18-de keçirilecek.
Yanvar 16-dan Aqmescitte Ahtem Çiygoznıñ işi boyunca mahkeme toplaşuvları devam etti.
