«Hizb ut-Tahrir» işi boyunca Yaltada yaqalanğan Refat Alimovnıñ SİZO-da soñki aftalar devamında endi üçünci sefer büyrekler hastalığı şiddetlendi.
Bu aqta «Qırım birdemligi» birleşmesiniñ faali Anna Bogaçeva, SİZO-ğa kirgen adliyeciniñ sözlerine esaslanıp, bildirdi.
«Tibbiy hadimler çağırıldı, olar vaqıt keçken soñ keldi, ine urdılar. Bundan soñ Refat daa ziyade yaramaylaştı: yürek bulanuvı başlandı, o, ağrıdan tabanda büküldi. Ekinci sefer çağırılğan ekim kene de çoq vaqıt keçken soñ keldi, bundan soñ ayttı ki, Refat ağrı olğanı aqqında yalan ayta. Onen beraber odada bulunğan yaqalanğanlar onıñ tibbiy bölükke keçirilmesini talap etti, işte bu yapıldı. O yerde ağrı yoq etken ine uruldı, ve Refat özüne kelmege başladı. Bu sefer olğan keskin ağrıdan ğayrı, o, er kün ağrıdan qıynala», – dep yazdı o Facebook saifesinde.
Avdetniñ bildirgenine köre, Qızıltaş (Krasnokamenka) köyüniñ sakinleri Refat Alimov ve Arsen Cepparov aprel 18-de tintüvler keçirilgen soñ yaqalandı. Avgust 14-te Qırım musulmanları, Rusiyede terroristik olaraq tanılğan «Hizb ut-Tahrir» teşkilâtınıñ faaliyetinde iştirak etkeninde şeklenilgen Refat Alimov, Arsen Cepparov ve Enver Bekirov içün dua etti.
Yaltada yaqalanğan musulmanlarnıñ soy-sopları ayta ki, olar «Hizb ut-Tahrir» ile iç te bağlı degiller. Olarnıñ ekisi – yaş yigit – 1990 senesi doğdı. Arsen Cepparov soñki vaqıtları ocaqçı ve qurucı olaraq çalışqan edi. O erte evlendi ve onıñ endi beş yaşındaki qız balası bar.
Refat Alimov ticariy temsilci olıp çalışqan ve futbolnen oğraşqan edi. Olarnıñ içtimaiy ağlardaki saifelerinde «Hizb ut-Tahrir» ve aslında siyasetnen bağlı iç beyanatları yoq.
