Bağçasarayda qırımtatar kişi qanunsız keçirilgen mitingde iştirak etkeni içün mahküm etilecek

19.01.201710:05

Yanvar 23-te Bağçasaray mahkemesinde Osman Belâlovnıñ işi boyunca mahkeme toplaşuvı keçirilecek, o, qanunsız keçirilgen kütleviy merasimde iştirak etkeninen qabaatlana. Belâlov, Bağçasarayda 2016 senesi mayıs 12-de tintüvler keçirilgen ve dört insan yaqalanğan soñ «Salaçıq» qavehanesinde olğan vaziyetni muzakere etken yerli sakinlerden biri oldı.

Uquq qoruyıcı Lilâ Gemeciniñ sözlerine binaen, Belâlovnıñ imayesi mahkemede qabaatlavğa qarşı çıqtı.

«Biz qayd etken edik ki, protokolda bu yerde bulunğanlar naqliyege nasıldır mania yapqanı aqqında qayd etilmegen, – dep ayttı o. – Mahkeme qarar çıqardı ki, protokolda obyektiv taraf aydınlatılmağan, ve o bir daa baqılmasına yollanıldı».

Yanvar 16-da Belâlov tüzetilgen protokol ile tanış olmaq içün politsiyağa davet etildi. Celpnamede o nasıl statusta bulunğanı qayd etilmegen edi, bunı politsiya hadimlerine bildirdi. Yañı celpnamede o, endi qanunnı bozğan kibi qayd etilgen. Cevap olaraq, Belâlov onı mahkeme qararından evel böyle adlandırğan politsiya hadimleri tarafından aqaretlev aqqında ariza yazdı.

«Bugün biz tüzetilgen protokol ile tanış oldıq, – dep ayttı Gemeci. – Bunen beraber, videonı seyir ettik, o yerde yahşı körüne ki, adamlar yol kenarındaki, qavehane yanındaki ziyaretçiler içün turaq yeri olğan meydançıqta tura. Olarnıñ yanından marşrutkalar serbest yüre, kimse kimsege keder etmey. Mahkemede buñı qayd etecekmiz».

Bundan da ğayrı, uquq qoruyıcı, «Salaçıq» yanında bulunğan kişilerge qarşı qabaatlavlar neden taqdim etilgenini soradı, amma oña bunı kimse añlatıp olamadı.

Uquq qoruyıcılarnıñ fikrince, tintüvler şaatlarınıñ celp etilüvi devam etecektir, dep bildire «Qırım.Aqiqat».

Dekabr 6-da Bağçasaray rayon mahkemesi Enver Şerfiyevni 15 biñ ruble para cöremesinen cezaladı, o, yerli «Salaçıq» qavehanesinde keçirilgen tintüvnen bağlı iş boyunca qabaatlandı. Aqay kişi qanunsız miting teşkil etüvde iştirak etkeni içün qabaatlı tanıldı. Mahküm etilgenniñ şefaat muracaatınen mahkeme diñlevi qırımtatar tilinde keçirildi.

Bundan evel Bağçasarary sakinleri Marlen Asanov, Emin Belâlov, Emil Belâlov, bunen beraber, Seyran Saliyev «Hizb ut-Tahrir» işi boyunca yaqalanğan musulmanlarnıñ evleri yanında qanunsız miting teşkil etüv ve bu mitingde iştirak etüv içün para cöremesinen cezalandı. Cöreme 10 biñden 20 biñ rublege qadar oldı.

Avdetniñ evel bildirgenine köre, mayıs 12-de Bağçasarayda rusiyeli uquq qoruyıcılar musulmanlarnıñ evlerinde, bunen beraber, yerli «Salaçıq» qavehanesinde bir sıra tintüvler keçirdi. Neticede Zevri Abseitov, Remzi Memetov, Rustem Abiltarov ve Enver Mamutov yaqalandı. Olar, Federal Havfsızlıq hızmeti (FSB) hadimleri tarafından Rusiyede terroristik tanılğan «Hizb ut-Tahrir» teşkilâtınen bağlı olğanında şeklenilip yaqalandı.