Ava vaziyeti sebebinden Qırım boyunca qazalar yüz bere (FOTO, VİDEO)

21.01.201719:20

Aqmescit rayonı, Eski Tahta Cami (Andrusovo) köyü, yanvar 21

Fevqulade vaziyetler nazirligi Qırım boyunca Baş idaresi yarımada sakinlerini ve musafirlerini yollarda diqqatlı olmağa ve, büyük ihtiyac olmasa, yollarğa naqliyenen çıqmamağa çağıra, çünki ava vaziyeti kerginleşkeninen qazalar olması mümkün.

Yanvar 21-de Aqmescitte, Metro supermarketi rayonında VAZ avtomobili iştiraginen qaza yüz berdi. «Jiguli» maşnası elektrik ağı tayamasına uruldı. Qaza neticesinde avtomobilniñ aydayıcısı ve yolcusı zararlandı, dep bildire «İskra».

«Krıminform» haber ete ki, Kezlev yolunda Aqmescit ava limanı rayonında qaza yüz berdi. VAZ maşnası, yol kenarına çıqıp, on yaşındaki balanı urdı.

Avdetniñ bildirgenine köre, yanvar 21-de Aqmescit civarındaki Acı Qal – Livadki (Çistenkoye – Levadki) köyleri rayonında üç maşna çatıştı. Avtomobillerniñ biri yol kenarına «uçtı». Qazada elâk olğanlar yoq.

Qaza iştirakçisi Olga Sedakovanıñ içtimaiy ağlarda bildirgenine köre, BMW aydayıcısı qarşı taraf yolğa çıqtı, Ford maşnasını urdı, soñra onıñ maşnasına uruldı.

дтп_левадки_

дтп_левадки

«Ayat birdir ve onı sevmek ve qıymetini bilmek kerek. Men beyaz Nissan içinde edim, men sağ qaldım. Qalğan iştirakçiler de. Qabaatlı olğanlarnen bağlı meseleni sigorta şirketi ve mahkeme baqacaq. Kimse anda elâk olmadı! Kemikler yahşı olur, yaralar keçer! Er keske tınçlıq tileyim», – dep yazdı o.

Bundan da ğayrı, Aqmescit-Aqyar yolunda yanvar 21-de daa bir qaç qaza yüz berdi..

Avtomobil Aqmescit civarındaki «Molodöjnoye köyü» turağını yoq etti. Qırım boyunca Devlet avtoinspektsiyası qaza qurbanları aqqında şimdilik bildirmey.

Avdetniñ haberlerine içtimaiy ağlarda abune oluñız: Vkontakte | Facebook | Одноклассники | Telegram.

Author: Редакция Avdet

Avdet gazetası