Yanvar 20-de Kiyevde Saksaganskogo soqağında yerleşken «Musafir» qırımtatar qavehanesinde yanğın yüz berdi.
Vaqia aqqında haber qurtarıcılarğa saat 17:53-te keldi. Bu yerge kelgen yanğıncılar belgiledi ki, yanğın avalandıruv ocağında yüz berdi.
Bir qaç daqqa içinde ateş söndürildi. Yanğın avalandıruv şahtasına ve elektrik ağlarına zarar ketirdi. İlk malümatlarğa binaen, bunıñ sebebi, avalandıruv şahtasına qığılçım tüşkeni oldı.
Qurtarıcılar, ateşni söndürgende, qavehaneden havfsız mesafege 30 adamnı çıqardı, kimse zararlanmadı. Vaqia yüz bergen yerde 4 esas ve mahsus yanğın-qurtarıcı tehnika ve 16 yanğıncı çalıştı.
«Musafir» qavehanesiniñ Facebook ağındaki resmiy saifesinde aytıla ki, qavehane yaqın künleri qapalı olacaq, yanğın aqibetleri tüzetilecek.
Cemaatçı Ayder Mujdabanıñ bildirgenine köre, qavehane yanvar 25-ke qadar qapalı olacaq.
«Ustalarğa restorannıñ havfsız çalışma sistemasını tüzetmek içün bir qaç kün kerek olacaq. Ümüt etemiz ki, yanvar 25-te sizni musafirlikte qarşılap olurmız», – dep yazdı Mujdaba Facebook saifesinde.
