Yanvar 22-de Ukraina prezidenti Petro Poroşenko Qırımtatar Milliy Meclisiniñ (Rusiye Federatsiyasında 26.04.2016 mahkeme qararınen yasaq etilgen) reisi Refat Çubarov Azatlıq nişanınen mukâfatlandırdı.
Qırımtatar milliy areketiniñ faali, «devlet qurucılığına, Ukrainanıñ içtimaiy-iqtisadiy, ilmiy-tehnikiy, medeniyet-tasil saalarında inkişafına, ukrain cemiyeti birleştirüv işine şahsiy isse qoşqanı ve çoq yıl devamında insaf ile çalışqanı» içün mukâfatlandırıldı.
Taqdim merasimi, Ukraina Birleşüv kününe bağışlanğan tedbirler çerçivesinde, Kiyevdeki Taras Şevçenko adına milliy müzeyde keçirildi.
«Soñki üç yıl, aytqan sözlerimizge ve yapqan işlerimizge qıymet kese», − dep ayttı Refat Çubarov.
Onıñ qayd etkenine köre, Ahtem Çiygoz, Ali Asanov, Mustafa Degermenci, Nikolay Semena ve diger qırımtatar ve ukrain faalleri azat etilsin dep, elinden kelgenini yapar.
«Bugün Azatlıq ordenini Ukraina ve qırımtatar halqınıñ itibarlı oğlu Refat Çubarov aldı, o, Mustafa Cemilev ile beraberlikte, qırımtatarlarnıñ aqlarını qorçalamaq içün elinden kelgenini yapa. Refat ile bir sessiya zalında ve bir taqımda bulunmaq, büyük bir şereftir», − dep yazdı Ukraina Yuqarı Radası spikeriniñ birinci muavini İrina Geraşenko Facebook saifesinde.
