Qırımda, hususan Bağçasaray şeeri ve rayonında, belli olmağan şahıslar qırımtatar tilinde firqa edebiyatını faal şekilde tarqata.
Bu aqta Bağçasaray camilerinden biriniñ imamı yanvar 20-de keçirilgen cuma namazı vaqtında haber etti.
İmam qırımtatarlarnı ve bütün musulmanlarnı muqayt ve diqqatlı olmağa çağırdı.
Avdetniñ elde etken malümatına binaen, qırımtatar ealisi arasında tarqatılğan taqvim «Qırım Cumhuriyeti İHBKB» («Qırım Cumhuriyeti İncil hristian-baptistler kilseleriniñ Birligi») diniy teşkilâtı tarafından qabul etilgen. Cemi 3000 nushadan ibarettir. Taqvim «POLİPRİNT» basmahanesinde derc etildi.
Edebiyat musulman ve şarq üslübinde bezetilgen.
2013 senesi baptizmni kütken qırımtatarlar Aqmescitteki Bor Çoqraq (Fontanı) qasabasında Milât bayramına bağışlanğan merasimni teşkil etti ve bu yerge qırımtatar balalarını davet etti.
Resmiy olmağan malümatqa binaen, qırımtatarlar arasında endi çoq baptizm kütken adamlar, İegova (Yahve) şaatları, yedinci kün adventistleri ve digerleri bar. Bunıñ sebebi pek sadedir: qırımtatarlar öz din temellerini bilmey.
Telegramda kanalımızğa qoşulıñız ve eñ aktual ve meraqlı malümatlardan haberdar oluñız
