«Hizb ut-Tahrir» işi boyunca yaqalanğan üç qırımtatar kişi, hususan Nuri Primov, Ferat Sayfullayev ve Rustem Vaitov, Rostov-na-Donu şeerindeki SİZO-dan başqa yerge alıp ketirildi.
Bu aqta «Rosuznik» leyhasınıñ idarecisi Yana Gonçarova Facebook saifesinde bildirdi.
Bu iş boyunca yaqalanğan daa bir kişi, yani terroristik faaliyetini teşkil etüvinen qabaatlanğan Ruslan Zeytullayev, SİZO-da qaldırılıp, işniñ bir daa baqılmasını bekleycek.
Sentâbr 7-de Rostov-na-Donu şeerindeki Şimaliy-Qavqaz arbiy okrug mahkemesi «Hizb ut-Tahrir» işinen bağlı yaqalanğanlar boyunca üküm çıqardı. Böyleliknen, terroristik faaliyetni teşkil etkeninen qabaatlanğan Ruslan Zeytullayev 7 yılğa apiske qapatıldı, Ferat Sayfullayev, Rustem Vaitov, Nuri Primov 5 yılğa umumiy nizam koloniyasına tüşti.
Avdetniñ bildirgenine köre, Rusiye Federatsiyası Yuqarı mahkemesi prokurornıñ şikâyetini qanaatlendirdi ve «Hizb ut-Tahrir» bölügini teşkil etkeninen qabaatlanğan Ruslan Zeytullayevniñ işini Rostov-na-Donu şeerindeki Şimaliy-Qavqaz arbiy okrug mahkemesine yolladı. Dava baqılması neticesinde Zeytullayevniñ cezası daa qattı olacaq. 205.5 maddesiniñ 1-ci qısmı («Terroristik teşkilâtnıñ faaliyetini teşkil etüv») 15 yılğa ya da ebediyen apiske qapatılmasını közde tuta.
Telegramda kanalımızğa qoşulıñız ve eñ aktual ve meraqlı malümatlardan haberdar oluñız
