Qırımnıñ Rusiyege qoşulmasına qol tutmağan Tillerson AQŞ devlet kâtibi oldı

24.01.201711:50

Amerika Qoşma Ştatları Halqara meseleler boyunca senat komiteti Amerika devlet kâtibi vazifesine Qırımnıñ Rusiyege qoşulmasına qol tutmağan Reks Tillersonnıñ namzetini qabul etti.

Komitette keçirilgen rey berüv neticesine binaen, oña 11 senator qol tuttı, qarşı 10 kişi oldı. Qol tutqan bütün senatorlar cumhuriyetçiler ola. Demokratlar, bu cümleden, prezident muavini vazifesine Demokratik firqasından sabıq namzeti Tim Keyn, qarşı oldı. Endi Tillersonnıñ namzetini senatnıñ bütün terkibi qabul etmek kerek.

Tillerson, senatta sözde bulunıp, ayttı ki, şimdiki vaqıtta Rusiye ğayrı dostane raqip ola, amma bunen beraber Moskva ve Vaşington duşmanğa çevirilmez dep ümüt beslegenini bildirdi, ve eki devlet arasındaki muzakerelerniñ müimligini qayd etti.

AQŞ-nıñ Rusiyege qarşı sanktsiyalar aqqında laf etkende, Tillerson bunıñ tışqı siyasetniñ müim aleti olğanını ayttı.

Diñlevler keçirilgen vaqıtta Tillerson Rusiyeniñ Qırımğa aqqını tanımaqnı red etken edi. Bundan da ğayrı, «Magnitskiy aktına» qol tuttı ve Rusiyeniñ Süriyedeki areketleri uyğun olmağanını ayttı, lâkin, RF prezidenti Vladimir Putinniñ areketlerine «arbiy cinayet» dep aytmaqtan vazgeçti.

Фото аватара

Автор: Редакция Avdet

Редакция AVDET