Yanvar 24-te Qırım Yuqarı mahkemesinde belli qırımtatar faali Ahtem Çiygoznıñ işi boyunca altmış sekizinci toplaşuv keçirildi.
Çiygoznıñ apayı Elmira Ablâlimovanıñ bildirgenine köre, mahkeme, qabaatlav tarafından taqdim etilgen video malümatlarını baqmağa devam etti.
«Videolarnıñ birinde azbar merkezinde eki bir-birine qarşı mitingniñ arasındaki sıñırda, adamlar bir-birine itekley edi. Bunen beraber, sıquv eki taraftan edi, idare etilmez, qarışıq edi, kütleviy degil de, maalliy edi», – dep añlattı o.
Bundan da ğayrı, Ablâlimova qayd etti ki, videoda eşitile ki, Yuqarı Şura binası azbarında öyle bir şamata edi ki, Ahtem Çiygoz tarafdarlarına sanki bergen emirlerini eşitmek mümkün degil edi. Bunen beraber, iç bir videoda balta, lesker ve diger aletler körünmey, amma zararlanğanlar ve qabaatlavnıñ şaatları ayta ki, qırımatatarlar böyle aletlernen silâlanğan edi. Ve miting iştirakçilerinden kimseler közyaş peyda etici gaznı qullanğanı körünmey, dep bildire Qırım.Aqiqat.
Ahtem Çiygoz, imaye tarafınıñ daimiy narazılığına baqmadan, toplaşuvlarda video bağ vastasınen iştirak ete. Şimdiki vaqıtta qabaat delillerini qabaatlav tarafı taqdim ete, bundan soñ mahküm etilgenniñ adliyecileri işni başlaycaq.
Avdetniñ bildirgenine köre, fevral 2-ge Aluşta regional Meclis (Rusiye Federatsiyası territoriyasında 26.04.2016 s. mahkeme qararınen yasaq etilgen) idaresiniñ sabıq yolbaşçısı, şeer memuriyeti yolbaşçısınıñ sabıq muavini Enver Arpatlınıñ video sorğuğa çekilmesi planlaştırılğan. O, Ahtem Çiygoznıñ işi boyunca qabaatlavnıñ esas şaatlarından biri oldı.
Telegramda kanalımızğa qoşulıñız ve eñ aktual ve meraqlı malümatlardan haberdar oluñız
