Emil Kurbedinov 10 künge apis etildi

26.01.201721:45

Yanvar 26-da Qırım adliyecisi Emil Kurbedinov Rusiyede yasaq etilgen «Hizb ut-Tahrir» teşkilâtınıñ mitinginden üç yıl evel video paylaşqanı içün mahküm etildi. O, 10 künge apis etildi.

Bu aqta Kurbedinovnıñ zenaatdaşı ve dostu Edem Semedlâyev bildirdi.

O, bu qararnıñ Kurbedinov qırımtatarlarnıñ davalarında imayeci olğanı munasebetinen adliyecige basım olğanını saya. Bunen beraber, Semedlâyev yanvar 25-te adliyeci Nikolay Polozov ile bağlı yüz bergen vaqianı da hatırlattı: onı FSB-ge mecburiy sorğuğa alıp ketirdiler.

Kurbedinov yanına namazlıq aldı ve oña sıcaq urba ketirilmesini rica etti.

Avdetniñ bildirgenine köre, adliyeci Emil Kurbedinov Rusiye Federatsiyası Memuriy qanun bozuvları aqqında kodeksiniñ 20.3-ci maddesi («Milliyetçi timsallerini, ya da ekstremistik teşkilâtlarnıñ timsallerini, ya da teşviqatı ya halq ögünde kösterüvi federal qanunlarnen yasaq etilgen timsallerni teşviq etüv ya da halq ögünde kösterüv») boyunca mahküm etildi.

Dava açılmasınıñ sebebi, Aqmescitte (Simferopol) 2013 senesi Rusiyede yasaq etilgen «Hizb ut-Tahrir» teşkilâtı tarafından teşkil etilgen mitingden videonıñ Facebook saifesinde yerleştirilmesi oldı.

Kurbedinov mahkemede qabaatını qısmen tanıdı ve qayd etti ki, işbu videonı paylaşqan vaqıtta «Hizb ut-Tahrir» teşkilâtı Qırımda qanunğa uyğun olıp faaliyetini alıp barğan edi.

«O vaqıt, uzaq 2013 senesi, Aqmescitte «Hizb ut-Tahrir» teşkilâtınıñ çoq mitingi keçirilgen edi, ve men video ve foto malümatlarını paylaşabildim. Amma iç teşviqat aqqında söz yürsetilmey. O vaqıt «Hizb ut-Tahrir» Qırımda yasaq degil edi, qanunğa uyğun olıp faaliyetini alıp barğan edi. Men videonı paylaştım ve bu aqqında unuttım. Ekstremizmge qarşılıq merkeziniñ hadimleri maña bu yazı qanunnı bozğanını bildirse edi, men onı birden siler edim. Nasıldır niyetim yoq edi. Men bu yazı aqqında unuttım», – dep bildire Anton Naumlük Kurbedinovnıñ sözlerini.

Mahküm etilgenniñ adliyecisi Konstantin Rustemov muracaat etti ki, ceza para cöremesine qadar olsun.

Aynı vaqıtta, bugün evinde tintüv keçirilgen Bağçasaray sakini Seyran Saliyev Rusiye Federatsiyasınıñ Memuriy qanun bozuvları aqqında kodeksiniñ eki maddesi boyunca mahküm etildi – RF Memuriy qanun bozuvları aqqında kodeksiniñ 20.3-ci («Milliyetçi timsallerini, ya da ekstremistik teşkilâtlarnıñ timsallerini, ya da teşviqatı ya halq ögünde kösterüvi federal qanunlarnen yasaq etilgen timsallerni teşviq etüv ya da halq ögünde kösterüv») ve 20.29-ci («Ekstremistik malümatlarnı yapuv ve tarqatuv») maddeleri. Birinci madde boyunca Saliyev 12 künge apiske qapatıla.

Avdetniñ bildirgenine köre, qırımtatar faalleri Ahtem Çiygoz ve İlmi Umerovnıñ adliyecisi Nikolay Polozov Avropa Şurası Parlament assambleyasınıñ (PACE) yanvar sessiyasında iştirak etti. Adliyeci, sözde bulunıp, Qırımda adliyeciler taqip etilgenini bildirdi.

Telegramda kanalımızğa qoşulıñız ve eñ aktual ve meraqlı malümatlardan haberdar oluñız

Author: Редакция Avdet

Avdet gazetası