Yanvar 27-de adliyeci Nikolay Polozov Federal adliyeciler palatasına ve Moskva Adliyeci palatasına FSB-nıñ qanunsız areketleri munasebetinen muracaat etti.
Bu aqta o Facebook saifesinde yazdı.
Bu künleri Rusiye FSB hadimleri qırımtatar faalleri Ahtem Çiygoz ve İlmi Umerovnıñ adliyecisi Nikolay Polozovnı Aqmescitte tuttı ve onı qanunsız sorğuğa alıp ketti. Adliyeci uquq qoruyıcılarnıñ böyle areketlerini qaçıruv olğanını saydı.
Avdetniñ bildirgenine köre, yanvar 26-da uquq qoruyıcılar adliyeci Emil Kurbedinovnıñ ofisi ve evinde tintüv keçirdi. Emil Kurbedinov Rusiye Federatsiyası Memuriy qanun bozuvları aqqında kodeksiniñ 20.3-ci maddesinde («Milliyetçi timsallerini, ya da ekstremistik teşkilâtlarnıñ timsallerini, ya da teşviqatı ya halq ögünde kösterüvi federal qanunlarnen yasaq etilgen timsallerni teşviq etüv ya da halq ögünde kösterüv») qayd etilgen qanun bozuvınen qabaatlana. Kurbedinov mahkemede qabaatını qısmen tanıdı.
Telegramda kanalımızğa qoşulıñız ve eñ aktual ve meraqlı malümatlardan haberdar oluñız
