Rusiye prezidentiniñ İnternet inkişafı meseleleri boyunca mesleatçısı German Klimenko devlette internet sıñırlanuvı malümat havfsızlığını teminlemek içün yekâne imkân olğanını ayttı.
«Bir yol bar – bu Qıtaydaki tecribedir. Elbet, kontrol kerek, çünki buña yol bermemek iç bir imkân yoq. Qıtay cemaat fikrine o qadar çoq diqqat bermey, olar havfını añladı ve internetni sıñırladı. Endi olarnıñ böyle problemaları yoq», – dep ayttı Klimenko Baş ştabnıñ Arbiy akademiyasında keçirilgen «Rusiyede malümat havfsızlığı» lektsiyasında.
Klimenkonıñ sözlerine köre, Rusiyede çalışqan ecnebiy şirketler sıq-sıq uquq qoruyıcılarnıñ talaplarına uymay, dep bildire «İnterfax».
Klimenko qayd etti ki, eger ecnebiy messencerler ve içtimaiy ağlar uquq qoruyıcı organları ile işbirlik tutmasa, «özüni ürmet etken er angi devlet olarnı alıp çıqarmaq kerek».
Dekabr soñunda Klimenko ilân etti ki, Rusiye dünya internetinden kesilmesine azır olmalı.
«Bizim ğarbiy ortaqlarımız Qırımda Google ve Microsoft servisleriniñ işini toqtattı. Em de Qırımda yaşağan domen saipleri yıllar devamında çalışıp qazanğanlarını coydı. Devletimiz dünya internetinden kesilmesine azır olmalı», – dep ayttı o RT-ge bergen intervyusında.
Klimenko qayd etti ki, Rusiyeniñ vazifelerinden biri – devletniñ dünya internetinden kesilmesi kibi vaziyetke yol bermemek içün «rusiyeli internet segmentini teminlemektir».
Telegramda kanalımızğa qoşulıñız ve eñ aktual ve meraqlı malümatlardan haberdar oluñız
