Qırım sakini yanğan evden üç balanı çıqardı

27.01.201722:06

Qarasuvbazar (Belogorsk) rayonınıñ Eski Burulça (Dolinovka) köyü sakini Vitaliy Harlamov, ölüm telükesi altında, yanğan evden üç kiçik balanı çıqardı.

Fevqulade vaziyetler nazirliginiñ Qırım idaresi matbuat hızmetiniñ bildirgenine köre, yanğın yanvar 26-da kündüz bir qatlı evniñ bir odasında yüz berdi. Yanğıncılar kelmezden evel, yerli sakin, o yerde buluna bilgenlerge yardım etmek içün, yanğan evge kirdi. Onıñ çağıruvına kimse cevap bermedi, amma odalarnı baqmağa devam etti. Tuman tolu odadaki divanda üç yuqlağan kiçik balanı taptı. Aqay kişi nevbetnen 2, 3 ve 5 yaşındaki balalarnı ateşten çıqardı.

Saat 15:55-te yanğıncılar ateşni tolusınen söndürdi. Ekspertler vaqia sebebini ögrene. Balalar Aqmescit (Simferopol) hastahanesine ketirildi. Olar baqıldı: er biri sağlamdır.

Fevqulade vaziyetler nazirliginiñ Qırım baş idaresi yolbaşçısı Sergey Şahov Vitaliy Harlamovğa balalarnı qurtarıp köstergen qaramanlığı içün teşekkür bildirdi ve qayd etti ki, yaş adam mukâfatnen taqdirlenecek.

Telegramda kanalımızğa qoşulıñız ve eñ aktual ve meraqlı malümatlardan haberdar oluñız

Фото аватара

Автор: Редакция Avdet

Редакция AVDET