«Artek» Gurzufta qadimiy musulman mezarlığını yoq ete

28.01.201712:30

Gurzufta «Artek» bala lageri reberiyetiniñ emirinen «Gurzuf-aziz» qadimiy musulman mezarlığı yoq etilip başladı.

Bu aqta yerli faal Natalya Kutsenko Facebook saifesinde bildirdi. Onıñ sözlerine köre, bu yerde musulman evliyası defin etildi. O añlattı ki, Gurzuf sakinleri politsiyağa ariza yaza.

«Mezarlıqnı ne Sovet Sotsialistik Cumhuriyetler Birligi vaqtında, ne de Ukraina vaqtında tiymediler. Evel bu yerde arap yazılarınen taşlar körüne edi, soñra mezarlıqnı ot bastı. Qırmızı kitapqa kirsetilgen çoq fıstıq östi», – dep yazdı Kutsenko.

Bunen beraber o, qurucılarnıñ sözlerine esaslanıp, bildirdi ki, bu yerde «Solneçnıy» («Küneşli») yañı lageri içün büyük bina qurulması planlaştırıla.

«Amma halq ayta ki, bu yerni «Artek» musafirleri ve sponsorları içün temizleyler!» – dep ayttı faal.

Telegramda kanalımızğa qoşulıñız ve eñ aktual ve meraqlı malümatlardan haberdar oluñız

Author: Редакция Avdet

Avdet gazetası