Bütün Dünya Qırımtatar Kongressi icra komitetiniñ toplaşuvında Qırımdaki soñki yaqalavlar muzakere etildi

29.01.201714:13

Tünevin, yanvar 28-de Kiyevde Bütün Dünya Qırımtatar Kongressi icra komitetiniñ toplaşuvı keçirildi.

Toplaşuvnıñ kün tertibinde esas mesele, adliyeciler Nikolay Polozov ve Emil Kurbedinovğa basım, bunen beraber, milliy areket faali Zodiye Saliyevanıñ oğlu Seyran Saliyevniñ yaqalanuvı oldı.

İcra komiteti işinde Türkiye, Poloniya, Litvaniya ve diger devletler delegatları iştirak etti.

«Ervin İbragimovnıñ yeri endi bir qaç toplaşuv devamında boş qalmaqta», – dep yazdı Tamila Taşeva Facebook saifesinde. Ervin İbragimovnıñ bulunğan yeri endi 8 aydan ziyade belli degil.

эрвин

Avdetniñ bildirgenine köre, Qırım adliyecisi Emil Kurbedinov Rusiyede yasaq etilgen «Hizb ut-Tahrir» teşkilatınıñ mitinginden üç yıl evel videonı paylaşqanı içün 10 künge apis etildi. Bundan evel ise, adliyeci Nikolay Polozov Aqmescitte FSB-ge sorğuğa qanunsız alıp ketirildi. Adliyeci uquq qoruyıcılarnıñ böyle areketlerini qaçıruv olğanını saydı.

Aynı vaqıtta, evinde tintüv keçirilgen Bağçasaray sakini Seyran Saliyev Rusiye Federatsiyasınıñ Memuriy qanun bozuvları aqqında kodeksiniñ eki maddesi boyunca mahküm etildi – RF Memuriy qanun bozuvları aqqında kodeksiniñ 20.3-ci («Milliyetçi timsallerini, ya da ekstremistik teşkilâtlarnıñ timsallerini, ya da teşviqatı ya halq ögünde kösterüvi federal qanunlarnen yasaq etilgen timsallerni teşviq etüv ya da halq ögünde kösterüv») ve 20.29-ci («Ekstremistik malümatlarnı yapuv ve tarqatuv») maddeleri. Birinci madde boyunca Saliyev 12 künge apiske qapatıla.

Avdetniñ bildirgenine köre, qırımtatar faalleri Ahtem Çiygoz ve İlmi Umerovnıñ adliyecisi Nikolay Polozov Avropa Şurası Parlament assambleyasınıñ (PACE) yanvar sessiyasında iştirak etti. Adliyeci, sözde bulunıp, Qırımda adliyeciler taqip etilgenini bildirdi.

Telegramda kanalımızğa qoşulıñız ve eñ aktual ve meraqlı malümatlardan haberdar oluñız