Putin Tramp ile Ukraina meselesini muzakere etti

29.01.20179:11

Rusiye prezidenti Vladimir Putin Amerika Qoşma Ştatları prezidenti Donald Tramp ile telefonnen laf etti.

Kreml matbuat hızmetiniñ malümatına binaen, 45 daqqa devam etken telefon muzakereleri çerçivesinde Putin Trampnı vazifege resmiy olaraq buyurğanı ile hayırladı. Devletler yolbaşçıları şahsiy körüşüv keçirilmesiniñ vaqtı ve yeri belgilenmesini avale etecekleri aqqında añlaştı.

Putin ve Tramp «aktual halqara problemalarını, bu cümleden, terrorizmge qarşı küreş, Yaqın Şarqtaki vaziyet, arap-israil davası, İran özek programması ve Koreya yarımadasınen bağlı vaziyetni» muzakere etti.

«Bunen beraber, Ukrainadaki buhrannıñ esas meseleleri da muzakere etildi. Bütün bu ve diger saalar boyunca işbirlik teminlenmesi aqqında añlaşıldı», – dep aytıla Kreml matbuat hızmetiniñ beyanatında.

Bundan da ğayrı, prezidentler «İraq ve Levant İslâm Devletini ve Süriyedeki diger terroristik taqımlarnı yoq etmek maqsadınen rusiyeli ve amerikalı faaliyet kerçek idare etüviniñ» teminlenmesi aqqında da söz yürsetti.

Bunen beraber, Putin ve Tramp «eki devlet iş daireleri arasında ticariy-iqtisadiy eki taraf içün elverişli munasebetlerniñ yañıdan tiklenilmesi» müim olğanını qayd etti.

Bir afta evel Donald Tramp resmiy olaraq AQŞ-nıñ 45-ci prezidenti oldı.

Telegramda kanalımızğa qoşulıñız ve eñ aktual ve meraqlı malümatlardan haberdar oluñız

Фото аватара

Автор: Редакция Avdet

Редакция AVDET