Aqmescitte (Simferopol) evakuatorlar yañlış qoyulğan maşnalarnı alıp ketmege devam ete.
Avdet mühbiriniñ bildirgenine köre, bugün üyle vaqtında Merkeziy bazar rayonında eki evakuator maşnası yañlış park etilgen avtomobillerni yükley edi.
Bundan evel İçki işler nazirliginiñ Yol areketi havfsızlığı devlet inspektsiyası (YAHDİ) Qırım Cumhuriyeti boyunca idaresiniñ müdiri Anatoliy Borisenkonıñ ilân etkenine köre, avtomobil şeer soqaqlarından tahliye etilgende er seferinde bu yerde YAHDİ hadimi buluna, o, naqliye vastasınıñ yaqalanuvı boyunca vesiqanı yapa. Tek bundan soñ maşna mahsus turaqqa alıp ketirile.
Onıñ sözlerine köre, evakuatorlar çalışıp başlağan ilk künleri mahsus turaqqa yollanılğan maşnalarnıñ aydayıcıları YAHDİ-ge, avtomobil qaçırılğanına şikâyet etip, telefon etken edi.
Aqmescit evakuator hızmeti hadimleriniñ bildirgenlerine köre, bir kün içinde olar ceza meydançığına tahminen 20-30 maşnanı alıp kete.
Foto: Avdet
Telegramda kanalımızğa qoşulıñız ve eñ aktual ve meraqlı malümatlardan haberdar oluñız
