Qırımtatar faali İlmi Umerovğa Rusiye Federatsiyası topraq bütünligini bozmaq maqsadınen areket yapmaq halq ögünde çağıruv boyunca qabaatlav taqdim etildi.
Bu aqta Federal havfsızlıq hızmeti Qırım ve Aqyar boyunca idaresiniñ matbuat hızmeti bildire.
Umerov qararnen tanış oldı, izaat bermekten vazgeçti. Yaqın vaqıtta dava malümatı Qırım prokuraturasına, soñra da mahkemege teslim etilecek.
Müessisede haber ettiler ki, Umerov tarafından taqiqatçılarğa qarşı şikâyetler olmadı ve subet konstruktiv şekilde keçti.
İlmi Umerovğa qarşı Rusiye Federatsiyası Cinaiy kodeksiniñ 280.1 maddesi 2-ci qısmı («Rusiye Federatsiyasınıñ topraq bütünligini deñiştirmek maqsadınen halq ögünde çağıruvlar ve areketler etüv») boyunca cinaiy iş açıldı. Bundan evel Qırım prokurorı Natalya Poklonskaya ilân etti ki, 2016 senesi mart ayında Umerov, Ukrainada bulunıp, ATR ukrain telekanalınıñ canlı yayınında iştirak etti, ve o yerde Rusiye Federatsiyasınıñ topraq bütünligini bozmaq kerek olğanı aqqında çağıruvlar ile halq ögünde sözde bulunğan edi.
Rusiye Federatsiyası Cinaiy kodeksine binaen, işbu madde ceza olaraq mecburiy işlerni (480 saatqa qadar, bunen beraber, belli bir vazifelerni eda etmek ve belli bir faaliyet alıp barmaq aqqından 3 yılğa qadar marum etüv) ya da apiske qapatuvnı (beş yılğa qadar, bunen beraber, belli bir vazifelerni eda etmek ve belli bir faaliyet alıp barmaq aqqından 3 yılğa qadar marum etüv) közde tuta.
Telegramda kanalımızğa qoşulıñız ve eñ aktual ve meraqlı malümatlardan haberdar oluñız
