Qırımda kütleviy şekilde yarıq söndürilip başladı

01.02.201718:54

Suvuq ava kelgeninen yarımadada kütleviy şekilde planlaştırılmağan yarıq söndürilmeleri başlandı.

Keriçte endi bir qaç kün devamında aqşam şeerniñ aman-aman üçte bir qısmı elektrik ağından kesile. Energetiklerniñ bildirgenlerine köre, vaziyet elektrik ağlarda çoq bozuluvlar yüz bergeninen bağlıdır, bu ise, sakinler ayazlı avada pek çoq elektrik qızdıruv aletlerini ve boylerni qullana.

«İç yarıq söndürüvleri cedvellerimiz yoq. Qazaiy vaziyetler yüz bere. Bozuluvlarnı tüzetmek içün bir-bir yarım saat kerek ola. Bugün elektrik energiyası ne yerde söndürilecegini aytıp olamaymız», – dep ayttılar Keriç Rayon elektrik ağlarında.

Daimiy yarıq söndürüvlerine Aqmescit (Simferopol), Bağçasaray ve Seitler (Nijnegorskiy) rayonlarında, Yalta, Aluşta, Sudaq ve Kezlevde (Yevpatoriya) yaşağan sakinler şikâyet ete. «Krımenergo» baş idaresinde aytalar ki, saba ve aqşam elektrik energiyası istimalı 1300 MVt teşkil ete, bu ise elektrik ağında qıtlaşuvnı (defitsit) peyda ete. Donatmalar buña dayanmay. Energetikler söz bere ki, afta soñuna yaqın, ava isineceginden soñ, planlaştırılmağan yarıq söndürilmeleri azca olur, dep bildire «Novıy den».

Author: Редакция Avdet

Avdet gazetası