Arpatlınıñ delilleri Çiygoznıñ qabaatlı olmağanını isbatlay – Polozov

03.02.20178:50

2014 senesi fevral 26-da Qırım Muhtar Cumhuriyeti Yuqarı Radası binasınıñ yanında kütleviy merasimlerni teşkil etüv içün Zaur Smirnov mesüliyetli edi, o vaqıt o, Meclis (Rusiye Federatsiyasında 26.04.2016 mahkeme qararınen yasaq etilgen) yolbaşçısınıñ muavini edi.

Bu aqta Ahtem Çiygoznıñ içi boyunca şaatlarnıñ sorğuğa çekilmesi vaqtında esas şaatlardan biri olğan, Aluşta regional Meclis idaresiniñ sabıq yolbaşçısı Enver Arpatlı ilân etti.

Adliyeci Nikolay Polozovnıñ fikrince, Arpatlı «Çiygoznıñ qabaatlı olmağanını isbatlağan aqiqiy delillerni ketire edi».

«Birinciden o ayttı ki, Meclis toplaşuvında iç kütleviy nizamsızlıq cinaiy planı işlep çıqarılmağan edi, bu ise, elbet, sırlı şaat Petrovnıñ delillerini red ete. Ekinciden, o, pek müim bir şey ayttı. Qabaatlavnıñ fikrince, Çiygoz çoq vaqıt devamında çeşit miting ve merasimlerniñ teşkilâtçısı olğan edi. Muqayese boyunca, o, fevral 26-da miting teşkil etmek kerek edi. Lâkin, 2013 senesi yañıdan saylavlar keçirildi ve vazifeler deñiştirildi. Bu vaqıttan başlap, mitinglerni teşkil etüvnen Zaur Smirnov oğraşa edi, hususan bunı şaat ayttı», – dep añlattı o.

Arpatlınıñ bundan soñ qayd etkenine köre, ne Zaur Smirnovnı, ne de Ahtem Çiygoznı o qabaatlamağan edi.

«Ne Zaur Smirnovnı, ne de Ahtem Çiygoznı men qabaatlamadım! Ve bunı iç bir vaqıt yapmadım. Berilgen suallerge olğanı kibi cevap berdim. Bu cümleden, Milliy Meclis azalarınıñ vazifeleri aqqında! Ve menimkiler aqqında da. Binanı zapt etmek, kütleviy nizamsızlıq teşkil etmek iç planları ve bu kibi avaleler yoq edi. Meclisniñ bütün azaları, bu cümleden A. Çiygoz, men ve Sergey Aksönov miting iştirakçileri arasında davağa yol bermemek içün areket etken edi», – dep yazdı Arpatlı Facebook saifesinde.

Arpatlı fevral 2-de Tataristandan video bağ vastasınen sorğuğa çekildi.

Avdetniñ evel bildirgenine köre, Aluşta regional Meclis (Rusiye Federatsiyası territoriyasında 26.04.2016 s. mahkeme qararınen yasaq etilgen) idaresiniñ sabıq yolbaşçısı, şeer memuriyeti yolbaşçısınıñ sabıq muavini Enver Arpatlı Tataristanda memur oldı. O, Ahtem Çiygoznıñ işi boyunca qabaatlavnıñ esas şaatlarından biri oldı.

Telegramda kanalımızğa qoşulıñız ve eñ aktual ve meraqlı malümatlardan haberdar oluñız

Author: Редакция Avdet

Avdet gazetası