Aqmescit (Simferopol) merkeziy soqaqlarınıñ tamirinen oğraşqan «Krım-development» şirketi 2 biñden ziyade kvadrat metrden ibaret olğan yol taşçıqlarını yañıdan qoyacaq ve ceza olaraq aman-aman bir million ruble para cöremesini töleycek.
Bu aqta şeer memuriyeti matbuat hızmeti, memuriyet yolbaşçısı Gennadiy Baharevniñ sözlerine esaslanıp, bildire.
Vatandaşlarnıñ muracaatınen Tehnikiy nezaret hızmeti tarafından keçirilgen teşkerüv neticesinde bir sıra qaide bozuvları qayd etildi.
Bundan evel «Krım-development» şirketiniñ baş müdiri Valeriy Pisarev bildirdi ki, qarlı ava ve Aqmescitniñ esas soqaqlarınıñ tamirlenüvi içün ayırılğan qısqa müddet yañı qaldırım taşçıqlarınıñ qoyulmasında bir sıra qusurlarnıñ sebebi oldı.
Oktâbr ayında Aqmescit akimiyeti qayd etti ki, merkez soqaqlarınıñ yañı yolları 20 yıldan ziyade qullanılacaqtır.
İçtimaiy ağlar qullanıcıları ayta ki, bundan evel Karl Marks ve Puşkin soqaqlarınıñ körünişi daa güzel edi, böyle tamirge ise diversiya dep aytalar.
Avdetniñ evel bildirgenine köre, Aqmescit merkezinde işçiler qaldırım taşçıqlarını ava arareti -10 dereceni teşkil etkende qoya edi. İşler, qarantlıq tüşken soñ da devam etken edi.
Bundan da ğayrı, Qırım blogeri Aleksandr Gorniy «Eho Moskvı» saytında «Diversantlar Aqmescit merkezine sürip kirdi» serlevalı fotoreportajnı paylaşıp, Aqmescit merkezindeki tamirni diversiya dep adlandırdı.
Foto: Avdet
Telegramda kanalımızğa qoşulıñız ve eñ aktual ve meraqlı malümatlardan haberdar oluñız
