Qırımda «Hizb ut-Tahrir» işi boyunca Yaltada yaqalanğanlarnıñ apiste bulunması müddeti uzattırıldı

04.02.201712:00

Qırım mahkemesinde «Hizb ut-Tahrir» işi boyunca Yaltada yaqalanğan dört musulman, yani Emir-Üsein Kuku, Muslim Aliyev, Enver Bekirov ve Vadim Siruknıñ apiste bulunması müddetini 2017 senesi aprel 8-ge qadar uzattırdılar.

Bu aqta malümat «Qırım siyasiy mabusları» gruppasınıñ Facebook saifesinde bildirile.

Yaqalanğan kişilerniñ yaqınları mahkeme toplaşuvı keçirilmezden evel ayttı ki, mahkeme qararı boyunca olarnıñ müsbet tahminleri yoq.

«Hizb ut-Tahrir işi» boyunca Yaltada ilk qabaatlanğanlar 2016 senesi fevral 11-de yaqalandı.  Olardan eñ belli olğan – İnsan aqları boyunca kontakt gruppasınıñ azası Emir-Üsein Kuku. Ondan ğayrı, qurucı olaraq çalışqanlar Aluştalı Muslim Aliyev ve Qızıltaş (Krasnokamenka) köyü sakini Enver Bekirov, bunen beraber, çiçekler satqan Yaltalı Vadim Siruk yaqalandı.

Avdetniñ bildirgenine köre, Qızıltaş (Krasnokamenka) köyüniñ sakinleri Refat Alimov ve Arsen Cepparov 2016 senesi aprel 18-de tintüvler keçirilgen soñ yaqalandı. Olar Rusiye Federatsiyası Cinaiy kodeksiniñ 205.5 maddesi 2-ci qısmı boyunca (Rusiyede terroristik tanılğan teşkilâtnıñ faaliyetinde iştirak etüv) qabaatlana.

Telegramda kanalımızğa qoşulıñız ve eñ aktual ve meraqlı malümatlardan haberdar oluñız

Фото аватара

Автор: Редакция Avdet

Редакция AVDET