Qırım Yuqarı mahkemesi qırımtatar faali Ahtem Çiygoznıñ apisten azat etilmesi aqqında imayeniñ şefaat arizasını qanaatlendirmedi.
Bu aqta Çiygoznıñ adliyecisi Nikolay Polozov Twitter saifesinde bildirdi.
Onıñ sözlerine köre, qarar alğanda, mahkemeciler, Çiygozğa nisbeten cezalavğa tesir etken şarait «deñişmedi», dep saydı.
Fevral 6-da Qırım Yuqarı mahkemesinde Ahtem Çiygoznıñ işi boyunca nevbetteki toplaşuv keçirildi. Mahkemede 2014 senesi fevral 26-da Yuqarı Şura yanında yüz bergen vaqialarnı köstergen şaatlarnıñ videoları ve rusiyeli telekanallarnıñ haber beyanatları ögrenile edi.
«Bu videolar bile Çiygoznıñ qabaatını tasdıqlamay. Birinci kanal ayttı ki, Yuqarı Şurada Rusiye bayrağı asıldı, amma o yerde ukrain bayrağı asılıp tura edi», – dep qayd etti adliyeci Nikolay Polozov.
Ahtem Çiygoz Aqmescit SİZO-sında 2015 senesi yanvar ayından başlap buluna, o, Rusiye Federatsiyası Cinaiy kodeksiniñ 212 maddesi 1-ci qısmı («kütleviy nizamsızlıqnı teşkil etüv») boyunca qabaatlana, madde boyunca qabaatlanğan kişi 10 yılğa qadar apiske qapatıla bile.
Telegramda kanalımızğa qoşulıñız ve eñ aktual ve meraqlı malümatlardan haberdar oluñız
