Qırımda 10 biñ insan yarıqsız qaldı

08.02.201717:05

Bugün, fevral 8-de, Qırımnıñ 49 meskün yerinde energiyanen teminlev bozuldı, bulardan 14 yeri – qısmen.

Esasen Qırımnıñ çöl rayonları zararlandı: Aqşeyh (Razdolnoye), Curçı (Pervomayskoye), Saq, Qurman (Krasnogvardeyskoye), Yedi Quyu (Lelino), Krasnoperekopsk, Canköy, Aqmeçit (Çernomorskoye) rayonları. Umumen olaraq, tahminen 10 bin abonent yarıqsız qaldı. Qazalarnıñ sebebi, şiddetli yel ve buzlavuq oldı, neticede teller yırtıldı.

«Krımenergo» müessisesiniñ energetikleri energiyanen teminlevni yañıdan tiklemege tırışa. Tamir işlerinde 66 qazaiy brigada (200-den ziyade adam) ve 70 tehnika çalışa, dep bildire müessiseniñ matbuat hızmeti.

Furtuna havfı vaqtında «Krımenergo» müessisesi ayrı rejim boyunca işni ilân etti.

Telegramda kanalımızğa qoşulıñız ve eñ aktual ve meraqlı malümatlardan haberdar oluñız