Qırımnıñ Rusiyege qoşulmasına bağışlanğan abidede qırımtatar kişi de tasvir etilecek

09.02.20179:37

Qırımda yarımadanıñ Rusiyege qoşulmasına bağışlanğan abide qoyulacaqtır. Rusiye medeniyet nazirligi ve Qırım ükümeti «Birleşken yaşlar frontu» lideri Nikolay Şlâminniñ alâqalı teklifini taqdirledi.

Şlâmin qayd etti ki, onıñ fikri Qırım sakinleri tarafından taqdirlense, abideniñ qoyulması içün bütün Rusiye boyunca para cıymağa başlar.

Onıñ sözlerine köre, abidede Qırım ealiniñ çoqluğı olğan üç halqnıñ temsilcileri, bu cümleden, qırımtatar tasvir etilecek.

«Abidede milliy urbalı rus, ukrain ve qırımtatar tura ve kitapnı tuta, o yerde böyle yazılğan: «Kimse bizni parlamaz, kimse bizni parçalamaz – Qırım tarihını beraber yazmalımız». Bu, devletniñ hayırına beraber çalışmaq kerek olğanımız aqqında bildire, o vaqıt balalarğa yahşı miras qaldıracaqmız», – dep ayta Şlâmin.

Abidede ne sebepten Qırımda yaşağan diger milletler içün yer tapılmağanı aqqında malümat bildirilmey.

Avdetniñ bildirgenine köre, 2016 senesi dekabr 30-da Aqmescit merkezinde «Narodnomu opolçeniyu» («Halq göñülli quvetleri») bağışlanğan abideniñ açılış merasimi keçirildi.

Telegramda kanalımızğa qoşulıñız ve eñ aktual ve meraqlı malümatlardan haberdar oluñız

Фото аватара

Автор: Редакция Avdet

Редакция AVDET