«Çiygoznıñ işi» boyunca mahkemede sırlı şaat sorğuğa çekildi

10.02.201712:40

Fevral 9-da keçirilgen «Çiygoznıñ işi» boyunca 78-ci mahkeme toplaşuvı çerçivesinde, mahkeme Ahtem Çiygoznıñ mahkeme zalına ketirilmesi aqqında şefaat arizasını baqmağa kene de red etkeninden soñ, prokuror qabaatlav tarafınıñ delilleri ketirilmesiniñ tertibini deñistirmek ve «Ablayev Memet Yusupoviç» uydurılğan adı ile sırlı şaatnı sorğuğa çekmek qarar aldı.

Bu aqta adliyeci Nikolay Polozov Facebook saifesinde bildirdi.

«Prokuror tarafından alıp barılğan sorğu devamında şaat kösterdi ki, o, Ahtem Çiygoz ile tanış degil, onıñ oña qarşı yaramay duyğuları yoq. Bunen beraber, şaat bildirdi ki, o, evel azırlanılğan nizamsızlıq aqqında haberdar edi. Bundan soñ, fevral 24-25 künleri, şaat ayttı ki, Meclis (Rusiye Federatsiyasında mahkeme tarafından 29.09.2016 yasaq etilgen) binası yanında Meclis azalarınıñ, bu cümleden Çiygoznıñ, çoq maşnasını kördi, ve özü tüşündi ki, o yerde miting azırlavı boyunca toplaşuvlar keşirile», – dep qayd etti Polozov.

Adliyeciniñ sözlerine köre, 2014 senesi fevral 26-da şaat Qırım Yuqarı şurası binasına keldi, o yerde kördi ki, sanki Çiygoz ses ve işaretlernen belli olmağan şahıslarğa avaleler bergen edi, bundan soñ «qarışıqlıq, militsiya sıralarınıñ dalğalanuvı başlandı, militsiya hadimleriniñ bazılarını yerge yıqtırğan ediler, «Russkoye Yedinstvo» firqasınıñ tarafdarlarına nisbeten zorbalıq qullanılğan edi. Binağa sürip kirüv aqqında bile, amma özü körmedi. Mitingni tahminen saat 16:00-da terk etti», dep bildire «Qırım.Aqiqat».

«Sual bermek aqqı imaye tarafına keçkende, feyeriya başlandı. Şaatqa sual berildi ki, Çiygoznıñ nasıl avtomobili olğanını (eger onen tanış olmağan olsa) qaydan bile ve fevral 24 ve 25 künleri saat qaçta avtomobilni kördi. Şaat ayttı ki, bu, «Е» sınıflı Mercedes edi, amma vaqıtnı aytmaqtan vazgeçti, çünki Meclis binasında video kameraları bar edi ve üç yıl keçken soñ imaye sanki o kameralardan videonı tapıp, şaatnıñ şahsiyeti aqqında malümatlarnı açıqlay bile. Mahkeme şaatqa qol tuttı ve qanunsız şekilde sualnı alıp çıqardı», – dep qayd etti Polozov.

Adliyeci bildirdi ki, imayeniñ suallerine şaat Ahtem Çiygoznıñ Meclis binasında fevral 24 ve 25 künleri bulunğanı aqqında bilemi açıq cevap berip olamadı.

Çiygoznıñ mahkemede imayecisi qayd etti ki, bundan soñ şaattan azırlanılğan nizamsızlıq aqqında qaydan bilgenini soradılar.

«Şaat bildirdi ki, bunı oña Meclisniñ altı azası ayttı, soñra ayttı ki, eki Meclis azası. Lâkin, olarnıñ adlarını aytmaqtan vazgeçti, ve ayttı ki, bu, onıñ aqqında malümatlarnı açıqlay bile. İmaye şefaat arizasını berdi ki, şaat taraflarğa onıñ aqqında hususan qaysı malümat açıqlanmamaq kerek olğanını añlatsın. Belli oldı ki, Meclis azalarınıñ adları şaat aqqında malümatlarnı açıqlamaz. O vaqıt şaat Meclisniñ qaysı azaları oña azırlanılğan nizamsızlıq aqqında bildirgenlerini unuttı», – dep ayttı Polozov.

Bundan soñ şaat bildirdi ki, 2014 senesi fevral 26-da vokzal tarafından öz şahsiy işlerinen ketkende Qırım Yuqarı Şurası binasına adamlar ketkenini kördi.

«Onıñ (şaatnıñ – Avdet) sözlerine köre, o, içki azbarğa kirmedi ve tışta sağ taraftan kolonnalar artında (bina kirişine baqqanda) tura edi. Başta şaat ayttı ki, o yerde saat 10:00-dan 11:00-ge qadar edi, soñra 15:40-15:50-de ketkenini bildirdi. Tögerek kolonnalar yanında, içki azbardan tış turğan ve belli olmağan adamlarğa ses ve işaretler ile avaleler bergen Ahtem Çiygoznı kördi. Şaat Çiygoznıñ hususan neni aytqanını eşitmedi, çünki ortalıq pek sesli edi, o ise, ondan 7-9 metr uzaqlığında buluna edi, lâkin o (Çiygoz – Avdet) bir ve eki qolunı QMC Yuqarı Şurası binasınıñ kirişi tarafına yöneltip, işaretler köstere edi, bu adamlar Çiygoznen qonuşıp, adam sürüsine kire edi ve o yerde nizamsızlıq başlana edi», – dep bildirdi Çiygoznıñ imayecisi mahkemede.

Polozov ayttı ki, Çiygoznıñ imayecileri öyle tüşündiler ki, sırlı şaat «Ablayev» bir özü degil edi ve kimse oña yavaştan ayta edi.

«Bu yerde şaatnıñ sorğuğa çekilmesi iş vaqtı yekünlengeni sebebinden toqtatıldı. Şaat «Ablayevniñ» sorğuğa çekilmesi kelecek mahkeme toplaşuvında bazarertesi künü (fevral 13-te – Avdet) devam etilecektir», – dep bildirdi Polozov.

Ahtem Çiygoz Aqmescit SİZO-sında 2015 senesi yanvar ayından başlap buluna, o, Rusiye Federatsiyası Cinaiy kodeksiniñ 212 maddesi 1-ci qısmı («kütleviy nizamsızlıqnı teşkil etüv») boyunca qabaatlana, madde boyunca qabaatlanğan kişi 10 yılğa qadar apiske qapatıla bile.

Foto: «Qırım.Aqiqat» videosından skrinşot

Telegramda kanalımızğa qoşulıñız ve eñ aktual ve meraqlı malümatlardan haberdar oluñız

Фото аватара

Автор: Редакция Avdet

Редакция AVDET