Bugün Aqmescitte (Simferopol) anbarlarnıñ birinde yüz bergen yanğınnı söndürmek içün Fevqulade vaziyetler nazirliginiñ 40-tan ziyade hadimi celp etildi.
Bu aqta Fevqulade vaziyetler nazirliginiñ Qırım Cumhuriyeti boyunca baş idaresiniñ matbuat hızmeti müdiri Vladimir İvanov bildirdi.
Avdetniñ evel haber etkenine köre, demiryol vokzalı yanında, Moskalev soqağı rayonında plastik pencereler bulunğan anbar binası yandı.
«Yanğın tahminen 200 kvadrat metrni qaplap aldı, bu, ayrı turğan anbardır, diger binalarğa yanğın keçmez. Şimdiki vaqıtta yanğıncılar birden bir qaç yönelişte çalışa. Yanğıncı-qurtarıcı hızmetiniñ 6 bölügi, 42 insan çalışa», – dep bildirdi İvanov.
Bunen beraber o qayd etti ki, ilk malümatlarğa köre, yanğın yüz bergen vaqıtta kimse anbarda yoq edi, er kes vaqtında binanı terk etmege yetiştirdi. Ekspertler ateş sebeplerini ögrenecek, dep bildire «Krıminform».
«Laboratoriya bu yerge çağırıldı, ekspertler yanğınnı söndürüv boyunca bütün işler yekünlenecegine qadar çılaşacaq», – dep ayttı İvanov.
Telegramda kanalımızğa qoşulıñız ve eñ aktual ve meraqlı malümatlardan haberdar oluñız
