Qırımtatar yazıcılar birliginiñ başı Uriye Edemova oldı

13.02.20179:20

Belli qırımtatar yazıcısı Uriye Edemova «Qırımtatar yazıcılar birligi» Qırım regional cemaat teşkilâtınıñ reisi oldı.

O, bu vazifege qırımtatar yazıcılarınıñ nevbetteki toplaşuvında saylandı.

Bundan evel teşkilâtnıñ yolbaşçısı qırımtatar edebiyatı klassigi Riza Fazıl edi, o, 2016 senesi noyabr 26-da vefat etti.

Uriye Edemova 1938 senesi Qırımnıñ Balıqlava rayonındaki Baydar köyünde doğdı. 1965 senesi Uriye hanım Taşkent devlet universitetiniñ mühbircilik fakultetini bitirdi, 1975 senesi ise, SSCB Yazıcılar birligi azası oldı. 1992 senesinden başlap, vatanğa, Qırımğa, qaytqan soñ, Uriye Edemova «Tavriya» neşriyatı qırımtatar bölüginiñ başı edi ve Qırım müendislik ve pedagogika universitetiniñ qırımtatar ve türk filologiyası fakultetinde oca olıp çalıştı.

Uriye Edemova 300-den ziyade eserniñ müellifi ola, bularnıñ arasında «Qırmızı gül», «Nişan yüzügi», «Yürek ateşi», «Baş yazısı», «Aydın gece» ve digerleri. Uriye Edemova ilk qırımtatar romanist-qadını sayıla.

Telegramda kanalımızğa qoşulıñız ve eñ aktual ve meraqlı malümatlardan haberdar oluñız